Amavubi agiye gukina na sudan na algeria yitegura CHAN

Ikipe y’Igihugu Amavubi yakatishije itike yo kwitabira igikombe cya Afurika cy’abakina mu bihugu byabo (CHAN) izakina imikino ibiri ya gicuti irimo uwa Sudani na Algeria mbere yo kwerekeza muri Maroc ahazabera irushanwa mu ntangiriro za 2018.

Iyi mikino yombi ya gicuti iteganyijwe mu ntangiriro z’umwaka utaha ubwo ikipe y’igihugu izaba iri mu mwiherero w’iminsi icumi izakorera muri Tunisia mbere yo kwerekeza mu Mujyi wa Tangier muri Maroc.

Umukino wa mbere uzahuza u Rwanda na Sudani uteganyijwe ku ya 6 Mutarama 2018 mu gihe uwa Algeria uzakinwa nyuma y’iminsi ine ku ya 10 Mutarama mbere y’uko Amavubi afata urugendo rugana muri Maroc aho irushanwa rizatangirira ku ya 12 Mutarama kugeza iya 4 Gashyantare 2018.

Umutoza w’Ikipe y’Igihugu Amavubi, Antoine Hey, yatangarije urubuga rwa Ferwafa dukesha iyi nkuru ko iyi mikino izamufasha kwitegura neza.

Yagize ati “Ni iby’ingenzi cyane guha abakinnyi bacu umwanya uhagije wo gukina no kwitegura. Mu mikino ya Cecafa (u Rwanda ruheruka kwitabira rugasezererwa rutarenze umutaru) twabonye ko ari intambwe ikomeye ku bakinnyi bava gukinira mu rugo bakagera ku rwego mpuzamahanga. Ni ngombwa ko abakinnyi bacu batangira kumenyera iyo mikino hakiri kare.”

Abakinnyi bazahamagarwa mu Amavubi bazerekeza muri Tunisia ku ya 1 Mutarama 2018, aho bazaba bitegura guhangana n’amakipe bari kumwe mu itsinda C. U Rwanda, Libya, Nigeria na Guinée Equatoriale bari kumwe, itsinda ryabo rizakinira mu Mujyi wa Tangier.

Umukino warwo wa mbere ruzawukina tariki ya 15 Mutarama na Nigeria; rukurikizeho Guinée Equatoriale tariki 19, rusoreze kuri Libya tariki 23 Mutarama 2018.

U Rwanda rwabonye itike yo kwitabira imikino ya CHAN 2018 nyuma yo gutsinda Ikipe y’Igihugu ya Ethiopie 3-2 mu mikino ya kamarampaka.

Amavubi agiye kwitabira CHAN ku nshuro ya gatatu kuva iri rushanwa ryashinga imizi ku mugabane wa Afurika mu 2009. Iya mbere ni iyabereye muri Sudani mu 2011 n’iy’umwaka ushize wa 2016 u Rwanda rwakiriye, igikombe gitwarwa na Repubulika Iharanira Demokarasi ya Congo.

Nsanzabera Jean Paul

www.kigalihit.rw 

I

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY’IGITEKEREZO CYAWE
Kwamamaza

Tanga Igitekerezo ukoresheje Facebook

IBITEKEREZO