Arsenal Na Chelsea zitwaye neza muri Premier League

Amakipe ya Arsenal, Chelsea, na Tottenham yitwaye neza mu mikino y’umunsi wa kane wa shampiyona y’u Bwongereza, abasha kwegukana amanota atatu.

Arsenal yanyagiye Bournemouth ibitego 3-0

Ku kibuga cyayo, Arsenal yanyagiye Bournemouth ibitego 3-0, birimo ibitego bya Danny Welbeck ku munota wa 6 n’uwa 50 mu gihe Alexandre Lacazette yatsinze igitego cya kabiri ku munota wa 27 w’umukino.

Alexis Sanchez yabanje ku ntebe y’abasimbura, yinjira mu kibuga ku munota wa 75, asimbuye Welbeck.

Leicester City 1-2 Chelsea

Ibitego bya Alvaro Morata ku munota wa 41 na N’Golo Kante ku munota wa 50 w’umukino ku ishoti rikomeye yatereye muri metero nka 25, bifashije ikipe ya Chelsea gukura amanota atatu ku kibuga cya Leicester City.

Jamie Vardy yatsinze impozamarira ya Leicester kuri penaliti yo ku munota wa 62, hari nyuma yo gukorerwa ikosa na Thibaut Courtois witwaye neza muri uyu mukino.

Eden Hazard n’umukinnyi mushya Zappacosta binjiye mu kibuga mu minota ya nyuma, basimbura.

Mu yindi mikino irangiye, Everton itsinzwe na Tottenham 3-0 birimo bibiri bya Harry Kane (28, 46) ndetse na Christian Eriksen ku munota wa 42.

Southampton yatsinzwe na Watford ibitego 2-0 naho Brighton & Hove Albion itsinda West Bromwich Albion ibitego 3-1.

Naho Stoke ikaba yanganyije na Manchester United 2-2 Eric Maxim Choupo-Moting wafunguye amazamu ku munota wa 43 ku ruhande rwa Stoke naho Marcus Rashford yishyura ku munota wa 45, bagarutse mu gice cya kabiri aho Romelu Lukaku yaje gushyiramo icya kabiri ku munota 57, ubwo rutahizamu wa Stoke ariwe Eric Maxim Choupo-Moting akishyura ku munota wa 63 ubwo umukino urangira utyo.

Ubu Manchester United ikaba iraye ku mwanya wa mbere n’amanota 10 igakurikirwa na Manchester City ku manota 10 irushwa umubare w’igitego kimwe, ku mwanya wa gatatu hakaza Chelsea n’amanota 9, ku mwanya wa kane hakaza Watford n’amanota 8 naho Tottenham Hotspus ikaza ku mwanya wa gatanu n’amanota 7.

Hakaba hari ku munsi wa 4 wa shampiyona y’ubwongereza.

IBITEKEREZO