Hanze

FERWAFA yihanganishije Ishyirahamwe ry’umupira w’amaguru muri Brezil!!

Umuyobozi w’Ishyirahamwe ry’umupira w’amaguru mu Rwanda (FERWAFA), Nzamwita Vincent de Gaulle yihanganishije Ishyirahamwe ry’umupira w’amaguru muri Brezil nyuma y’aho ikipe ya Associação Chapecoense de Futebol itikiriye mu mpanuka y’indege.

Ikipe ya Chapecoense

Indeye yari itwaye abagenzi bagera kuri 81 barimo n’iyi kipe yo mu cyiciro cya mbere muri Brezil yakoze impanuka mu ijoro ryo kuwa Mbere ubwo yerekezaga mu mujyi wa Medellin muri Colombia aho yari igiye gukina umukino wa nyuma wa Copa Sudamericana.

Mu butumwa Nzamwita yoherereje mugenzi we wo muri Brezil, Marco Polo Del Nero nk’uko bugaragara ku rubuga rwa FERWAFA, yagize ati “Birababaje kumva aya makuru ateye agahinda yerekeye impanuka y’indege.”

Yakomeje agera ati “Mu izina ry’Ishyirahamwe ry’umupira w’amaguru mu Rwanda, abayobozi, abakozi, abanyamuryango n’abakinnyi ndetse n’umuryango w’umupira w’amaguru, turabihanganishije ku bw’iyo mpanuka yaguyemo ikipe ya Associação Chapecoense de Futebol.”

Nzamwita yakomeje yihanganisha abafana b’iyi kipe ndetse n’umuryango w’umupira w’amaguru, abanyamakuru ndetse n’abaturage bo muri Brezil, ababwira ko umupira w’amaguru mu Rwanda wunamiye Chapecoense ndetse n’abandi bagizweho ingaruka n’iyi mpanuka yabereye muri Colombia.”

Abantu 76 baguye muri iyi mpanuka barimo ikipe ya Chapecoense igizwe n’abayobozi n’abatoza, aho yari igiye gukina umukino ubanza na Atletico Nacional yo muri Colombia.

Copa Sudamericana muri Amerika y’Amajyepfo ni irushanwa rigereranwa n’igikombe cya Europa League cyo ku mugabane w’u Burayi aho abaryegukanye babona itike yo gukina irushanwa rizwi nka Copa Libertadores.

Chapecoense nibwo bwa mbere yari igeze ku mukino wa nyuma mu mateka yayo kandi uyu mukino wari kuba ari wo ukomeye iyi kipe yari igiye gukina mu gihe cy’imyaka 43 imaze ishinzwe.

Nyuma y’impanuka

Tanga Igitekerezo ukoresheje Facebook
Click to comment

Leave a Reply

Your email address will not be published. Required fields are marked *

Inkuru zikunzwe

To Top