Ibihangano byo muri wasafi byafatiwe ingamba na Clouds Tv kubera umubyinnyi wa Diamond

Mose Iyobo, umubyinnyi uyoboye abandi muri Wasafi Records ya Diamond yakubise abanyamakuru babiri b’igitangazamakuru gikomeye muri Tanzania bibaviramo kujyanwa mu bitaro.

Uyu mubyinnyi uzwi cyane mu ba Diamond Platnumz yakubise Soudy Brown na Kwisa bakora mu kiganiro cyitwa Shilawadu biturutse ku bibazo bari bamubajije byerekeranye n’inkundura umugore we aherutse kugirana na Tunda uri mu bakobwa bavugwa cyane muri Tanzania.

Aba banyamakuru ba Clouds muri Tanzania banyujije amafoto ku mbuga nkoranyambaga abagaragaza bafite ibipfuko ndetse umwe yavunitse ijosi ashyirwaho kirishyigikira. Iyobo wabakomerekeje yanamennye ibikoresho bari bafite birimo Camera bakoresha mu kiganiro cyabo.

Mu kiganiro aba banyamakuru bombi basanzwe bakorera kuri Clouds bavuze ko bababajwe bikomeye na Iyobo wabakubise akanangiza ibikoresho byabo.

Umwe yagize ati “Akazi kacu kameze nk’ikizamini gikomeye cyane, benshi mu byamamare baradushyigikira. Umugoroba wa none ubwo twari mu kazi hari utatworohereje ubwo twasabaga kuganira n’umuntu, ubu dufite ibikomere byinshi mu mayunguyungu n’ibiganza, ibikoresho byacu nabyo byangijwe cyane.”

Iyobo ushinjwa gukubita aba banyamakuru atangaza ko ikirego cyo guhohotera abanyamakuru n’abandi bakozi ba televiziyo yabibonye ku mbuga nkoranyambaga ndetse no muri icyo kiganiro cyatambutse mu mpera z’icyumweru gishize.

Yagize ati “Nabyumvise mu kiganiro cyabo no ku mbuga nkoranyambaga, njye sindi ’bouncer’ cyangwa mayibobo yo kuba nakora ibyo bintu. Ntabwo nabakubise, baje bafite intego zo gushaka amakuru yo gutangaza, sinabyishimiye mpita nigendera.”

Abanyamakuru bavuga ko bahohotewe na Mose Iyobo ubyinira Diamond bavuze ko igitangazamakuru bakorera cyafashe umwanzuro wo kutazongera gutambutsa indirimbo z’abahanzi bo muri Wasafi Records kugeza ubuyobozi bwayo busabye imbabazi.

Babu Tale, uri mu bayobozi ba Wasafi Records yabwiye ikinyamakuru Mwananchi ko nta byinshi yavuga kuri ayo makuru kuko ngo bidafitanye isano n’akazi ahubwo ari ukwinjira mu buzima bwite bwa Mose Iyob ari nabyo byatumye habaho umwiryane hagati ye n’abanyamakuru bamushinja kubahohotera.

Aba banyamakuru bakomeje gusohora amafoto abagaragaza bafite ibipfuko ku ngingo zimwe na zimwe z’umubiri

Soudy Brown na Kwisa bakora mu kiganiro cyitwa Shilawadu kuri Clouds TV Tanzania bashinja umubyinnyi wa Diamond kubahohotera
Tanga Igitekerezo ukoresheje Facebook

IBITEKEREZO