Abikorera ku giti cyabo bateguriwe amarushanwa yo kubakangurira gukora siporo

Kompanyi  itegura ibitaramo  yitwa 1000 Hills Events yateguye irushanwa ry’umupira w’amaguru na Basketball rigamije gukangurira urwego rw’abikorera gushishikariza abakozi babo gukora siporo hirindwa indwara zitandura n’umubyibuho ukabije, rikazahuza ibigo 10 by’abikorera.

Ni irushanwa ry’umunsi umwe rizaba kuri iki Cyumweru tariki ya 03 Ugushyingo 2019 rikabera ku bibuga bibiri bya IPRC Kicukiro kuva saa moya za mu gitondo (07h00).

Ibigo 10 byiyandikishije mu mupira w’amaguru bigabanyije mu matsinda abiri aho itsinda rizakinira ku kibuga cya mbere rizaba rigizwe n’amakipe ane ari yo : Isango Star, Sulfo, Inos na Igihe naho itsinda rizakinira ku kibuga cya kabiri rikazaba rigizwe n’amakipe 6 ari yo : Radisson Blu, Rwandair, Toyota, Duru Juba, Inyange na Star Times.

Ibigo bibiri gusa ni byo bizakina umukino wa Basketball ari byo Radisson Blu na Rwandair.

Mu kiganiro n’abanyamakuru cyabaye kuri uyu wa Gatanu kigamije gusobanura uko iri rushanwa rizagenda n’intego yaryo, hahise hanakorwa tombola y’uko amakipe azahura aho mu itsinda rya mbere naho mu itsinda rya kabiri Radisson Blu na Rwandair nibyo bizafungura imikino yo muri iri tsinda naho Toyota izakurikireho icakirana na Duru Juba mu gihe Inyange izisobanura na Star Times.

Hasobanuwe ko aya makipe azagenda akuranamo maze haboneke abiri ajya ku mukino wa nyuma aho bazajya bakina iminota 60 (igice kimwe 30 n’ikindi 30)

Abajijwe ku bihembo biteganijwe, Nathan uyobora Thousand Hills Events yavuze ko ibihembo bidahambaye kuko intego nyamukuru ari ugushishikariza abakora mu bigo by’abikorera kudaheranwa n’akazi bakibagirwa kubungabunga ubuzima bwabo bakora siporo.

Nathan yagize ati “Insanganyamatsiko ni umukozi wagize ubuzima bwiza ni we utanga umusaruro utubutse. (…) ni mu rwego rwo gukangurira urwego rw’abikorera gushishikariza abakozi babo gukora siporo mu rwego rwo kurwanya indwara zitandura n’umubyibuho ukabije kuko akenshi na kenshi urwego rw’abikorera baragenda bakareba inyungu batareba ubuzima bw’umukozi.”

Nathan yavuze ko amafaranga y’ibihembo iyo abaye menshi usanga ibigo bibigira ubucuruzi ugasanga birimo birashaka abakinnyi basanzwe badakorera ibyo bigo kandi nyamara ikigamijwe ari uko bazakinisha abakozi babo bakaboneraho gukora siporo no gusabana na bagenzi babo bityo bakazajya bahora bakora siporo.

Thousand Hills Events isanzwe ifasha ibigo byigenga n’ibya Leta gutegura ibirori, gutanga ibihembo, inama n’ibindi bikorwa, ivuga ko yifuza ko iki gikorwa bajya bagitegura mu buryo ngarukamwaka ndetse ibigo byinshi bikakitabira aho bashaka ko ubutaha bazongeramo n’indi mikino irimo nka Cricket, Golf n’indi.

Facebook Comments
Share Button

auto ads

Recommended For You

About the Author: Jean paul Nsanzabera

Leave a Reply

Your email address will not be published. Required fields are marked *