Jacques Tuyisenge yatsinze Everton igitego bimuhesha arenga Miliyoni 6 Rwf

Rutahizamu mpuzamahanga w’ikipe y’igihugu Amavubi, Jacques Tuyisenge ukinira ikipe ya Gor Mahia yo muri Kenya yahishuye ko igitego yatsinze ikipe ya Everton ubwo yari muri Pre-Season muri Tanzania cyamuhesheje akayabo k’ibihumbi 7000 by’amadorali( asaga miliyoni 6Frw).

Ibi yabitangaje ubwo yari mu kiganiro cy’imikino cya Radio 10( Ten Weekend Sports), aho yavugiye amakuru menshi amwerekeyeho yaba mu buzima bwite bwe no mu ikipe ye ya Gor Mahia iheruka kwegukana igikombe cya shampiyona aho ndetse ari umwe mu bakinnyi bazatoranywamo uwahize abandi muri iyi shampiyona.

Jacques Tuyisenge ni we waboneye igitego 1 rukumbi Gor Mahia yatahanye kuri 2 yatsinzwe

Abajijwe niba igitego yatsinze Gor Mahia hari akamaro kihariye cyamugiriye, atazuyaje uyu rutahizamu ukomoka i Rubavu wari amaze iminsi mu biruhuko, yahise avuga ko iki gitego cyamuhesheje akazi ko kwamamaza aho Sports Pesa itera inkunga shampiyona ya Kenya yahise imwishyura 7000$ maze bagirana amasezerano y’uko iki gitego bagomba kukifashisha mu kwamamaza imishinga yabo mu gihe cy’imyaka 2 aho nta yindi shene ya televiziyo yemerewe kugikoresha mu buryo bw’ubucuruzi.

Uretse kandi kuba cyaramwinjirije aya mafaranga, Tuyisenge yavuze ko ari kimwe mu bitego by’ibihe byose kuri we kuko yagitsinze ikipe ikomeye ku isi ndetse kikaba cyaratumye abayobozi b’ikipe ya Gor Mahia bamugirira urukundo rudasanzwe.

Muri uyu mukino Tuyisenge yari yazengereje ab’inyuma ba Everton, aha yageragezaga kunyura kuri Ashley Williams 

Muri uyu mukino kandi Wayne Rooney na we yandikiyemo amateka dore ko yatsinze igitego cya mbere nyumayo gusubira mu ikipe ye yo mu bwana

Mu bindi uyu mukinnyi yavuze muri iki kiganiro, harimo kuba yifuza gutera intambwe yisumbuyeho akava muri shampiyona ya Kenya akerekeza mu zindi shampiyona zikomeye, yewe ngo afite abantu bagera muri 3 barimo bamufasha gushaka ikipe mu bice bitandukanye by’isi.

Jacques Tuyisenge yanagarutse ku mfura ye y’umukobwa, Sandra akunze gusangiza amafoto ye abamukurikira

Uyu musore kandi yanavuze ko byari kumushimisha cyane iyo akina imikino y’igikombe cya Cecafa kuko yari afite imihigo yagiranye na bagenzi be bakinira Kenya ariko ngo ntibyakunze.

Reba hasi igitego Jacques Tuyisenge yatsinze Everton

Tanga Igitekerezo ukoresheje Facebook

IBITEKEREZO