Kylie Jenner bucura bwo mu muryango wa Kardashian yibarutse

Umunyamideli umaze kubaka izina rikomeye muri Amerika, Kylie Jenner yibarutse umukobwa yabyaranye n’umuraperi bamaze iminsi bakururana.

Kylie Kristen Jenner w’imyaka 20 yatangiye kuvugwa mu nkuru z’urukundo n’umuraperi Travis Scott muri Mata 2017, nyuma y’amezi make bihwihwiswa beruye ko bakundana ndetse nibwo batangiye guhangwa amaso n’itangazamakuru.

Kylie Jenner yakunze kugira ubwiru ibijyanye n’amakuru yose yerekeye inda yari atwite ndetse yatangaje byeruye ko yabyaye nyuma y’iminsi itatu abyaye. Ikinyakamakuru The Sun cyatangaje ko uyu munyamideli yibarutse ku itariki ya 1 Gashyantare 2018 mu bitaro bya Cedars-Sinai mu Mujyi wa Los Angeles.

Uyu mukobwa yanditse kuri Instagram yisegura ku bafana be ku bwo guhisha amakuru yerekeye kubyara kwe. Yavuze ko yabikoze yirinda icyashyira hanze ubuzima bwe n’ubw’umwana yari atwite.

Yagize ati “Ndisegura ku kuba narabaretse mu icuraburindi […] Ndabyumva neza ko mwari mumenyereyeho kubasangiza ibyo nyuramo byose. Gutwita kwanjye nari narahisemo ko bitagaragara mu maso y’Isi yose.”

Yongeyeho ati “Ndashimira inshuti zanjye by’umwihariko umuryango wanjye kuba waramfashije kugira ubwiru ibi bihe bidasanzwe mu buryo bwose bushoboka.”

Ibyo gutwita kwa Kylie Kristen Jenner byatangarijwe rimwe n’indi nkuru y’inzu ye bwite izajya ikora iby’imideli yafunguye ku mugaragaro yitwa Kendall + Kyle.

Inkuru imaze gutangazwa ko Kylie Jenner atwite, Tyga[wahoze ari umukunzi we] yahise yandika kuri Snapchat ati ‘Ntabwo byumvikana, oya! Uwo ni umwana wanjye’, nyuma gato yahise ahanagura ubu butumwa ariko abenshi bari bamaze kububika.

Kylie Jenner yibarutse umukobwa kuwa 1 Gashyantare 2018

Kylie yibarutse nyuma y’iminsi mike ishize Kanye West na Kim Kardashian bakiriye umwana wa gatatu[batwitiwe n’undi mugore]; Khloe Kardashian na we atwite inda nkuru ya Tristan Thompson ukina muri NBA.

Kylie Jenner yavuze ko yahisemo kugira ibanga ibyo gutwita no kubyara kwe

Kylie Jenner na Travis Scott bamaze igihe kigera ku mwaka bakundana bizwi
Tanga Igitekerezo ukoresheje Facebook

IBITEKEREZO