Munyakazi Donatien niwe wegukanye imodoka ya Fuso muri promotion ya Bigereho na BK

Munyakayanza Donatien wo mu Karere ka Gatsibo yatomboye imodoka ya Fuso ifite agaciro ka miliyoni 38 z’amafaranga y’u Rwanda muri gahunda ya ‘Bigereho na BK’, yarigamije gushishikariza ababanyarwanda kurushaho kwizigamira na Banki ya Kigali.

Munyakayanza watomboye imodoka ashyikirizwa urufunguzo rwayo.

Munyakayanza Donatien watomboye imodoka yashimiye BK yashyizeho iyo gahunda, avuga ko imodoka ahawe igiye kumufasha kwagura ibikorwa bye by’ubucuruzi bw’imyaka, ati “Nta mwaka urashira mfunguje konti muri BK ,ariko ngiye kumva numva ndahamagawe bambwira ko ndi umwe mu banyamahirwe , nahise ntecyereza ko bidashoboka ariko kubera nemera Imana narabyemeye ntakindi navuga rwose ndanezerewe; iyi modoka igiye kumfasha mu mirimo nkora yo gupakira imyaka. Sinabona uko mvuga BK ahubwo n’abandi bakorane nayo kuko ntisanzwe ihindura ubuzima bw’abantu ndabibonye”.

Thierry Nshuti, Umuyobozi Ushinzwe Kumenyekanisha ibikorwa bya BK,yavuze ko ibyo bashakaga batangira iyi gahunda taliki ya 25 Kanama 2017 babigezeho ariko n’ibindi ngo birakomeje, yagize ati ”Twatangije gahunda ya Bigereho na BK tugamije gushishikariza Abanyarwanda gukorana na banki no kugira umuco wo kwizigama, ikindi kwari ugusangira n’abantu ibyishimo by’imyaka 50 Banki ya Kigali imaze ku isoko ry’u Rwanda.”

Akomeza avuga ko kuva iyo gahunda yatangira, abantu bashyize amafaranga ku makonti yabo yo kwizigama asaga miliyari ebyiri avuye mu Banyarwanda , kandi abantu ibihumbi 30 bafunguye konti nshya muri BK, abandi bagera ku bihumbi birindwi bongeye gukoresha konti bari bafitemo zari zimaze igihe zidakora.

Twababwira ko BK ifite gahunda nshya yo kuba abantu bagiye kujya basaba inguzanyo bakoresheje telefoni zabo ngendanwa batiriwe bajya kuri banki.‘Bigereho na BK’ irangiye itanzwemo amafaranga, ibikoresho byo mu nzu, inka, imodoka, za moto n’ibindi, byose hamwe bifite agaciro ka miliyoni 100 Frw.

Insanganyamatsiko y’irushanwa yari “Fungura, utsinde”, hari hateguwe inzugi eshatu, umuntu uri mu banyamahirwe agasabwa gutombora umubare mu gaseke, agafungura urugi ruhuye n’umubare yatomboye, akabona igihembo cye.

 

Uwa mbere watomboye muri batatu batoranyijwe mu gutsindira igihembo nyamukuru, ni Mushimiyimana Alpfonsine wafunguye agatombora moto; Muhizi Shaffy afunguye asangamo sheki y’amafaranga miliyoni y’amafaranga, uwa gatatu ari we Munyakayanza Donatien afunguye asangamo imodoka ya Fuso ifite agaciro ka Miliyoni 38 z’amafaranga y’u Rwanda.

Nsanzabera Jean Paul

www.kigalihit.rw

Tanga Igitekerezo ukoresheje Facebook

IBITEKEREZO