N’iki kihishe inyuma y’ibiganiro hagati ya Perezida wa Amerika n’umuhanzi Kanye West

Umuraperi Kanye West yasuye Perezida mushya wa USA, Donald Trump mu biro bye biri mu mutururirwa wa Trump Tower uherereye mu gace ka Manhattan mu Mujyi wa New York bagirana ibiganiro byihariye.

Kanye West yamenyekanye mu ndirimbo zirimo “All of The Lights”, “Good Life” n’izindi gusa akaba anazwi cyane biturutse ku buzima bwe n’ibyo akunze gutangaza. Ni umwe mu bahanzi bake cyane bagiye bagaragaza ko bashyigikiye Donald Trump uherutse gutorerwa kuyobora Leta Zunze Ubumwe za Amerika atsinze Hillary Clinton bari bahanganye mu matora.

Mu gitondo cyo kuri uyu wa 13 Ukuboza 2016, Kanye West yasuye Donald Trump mu biro bye bagirana ibiganiro mu muhezo, ndetse banashimangira umubano wabo bavuga ko bamaze igihe kirekire ari inshuti zikomeye.

Donald Trump, Kanye West n’umukobwa w’uyu muyobozi witwa Ivanka

Nyuma y’ibiganiro bagiranye babajijwe cyane n’abanyamakuru bari hafi aho basobanuzaga niba uyu muhanzi na we yaba ari umwe mu bo Donald Trump ashaka gushyira mu myanya y’ubuyobozi bwe cyangwa bakaba bari mu biganiro ngo azaririmbe mu birori by’irahira rye, gusa Kanye West asubiza agira ati “Icyo nshaka none aha ni ugafata ifoto gusa.”

CNN yavuze ko aba bombi bamaze iminota 15 mu kiganiro bagiranye mu muhezo. Umuvugizi wa Donald Trump mu biro bye witwa Hope Hicks yavuze ko Kanye West ari we wanditse asaba kubonana na Perezida watowe, bakakira ubusabe bwe, yanavuze ko bagiranye ibiganiro byiza kandi byatanze umusaruro gusa ntiyeruye ku byo baganiriye.

Ku muryango w’inyubako ya Trump Tower, Donald Trump yavuze ko Kanye West ari “umuntu mwiza” kandi ngo ‘bamaze igihe kirekire ari inshuti’. Yanabwiye itangazamakuru ko mu gihe yamaranye n’uyu muraperi mu biro bye ‘baganiriye ku buzima’.

Nyuma y’akanya abantu benshi bibaza icyo Kanye West na Donald Trump baganiriyeho, uyu muraperi yanditse kuri Twitter asobanura impamvu yatumye asaba ibiganiro hagati ye na Donald Trump ndetse aca amarenga agaragaza ko afite gahunda yo kuziyamamariza kuyobora Amerika mu 2024 nubwo yari yarihaye umwaka wa 2020.

Yagize ati “Nashatse guhura na Trump uyu munsi ngo tuganire ku kibazo cy’imico itandukanye muri sosiyete yacu”, arongera ati “Ibi bibazo birimo iby’iterabwoba no gukandamizanya, ibirebana no gushyigikira abarimu, kunoza imfashanyigisho mu buryo bujyanye n’igihe turimo, ndetse n’ibibazo [by’ubwicanyi bukoreshejwe imbunda] biri i Chicago.”

“Ndumva ari iby’ingenzi kugirana umurongo wihuse w’itumanaho na Perezida wacu w’ahazaza niba dukeneye impinduka koko.” Kanye West mu gusoza yanditse umubare 2024 ashaka kugaragaza ko yihaye indi myaka ine ngo yiyamamarize kuyobora Amerika.

Donald Trump ngo yabwiye Kanye West umaze iminsi mu bitaro ko ‘akwiye kwita ku buzima bwe’.
Kanye West winjiye mu muturirwa wa Trump Tower aherekejwe n’igikundi cy’abasore b’ibigango bari bamucungiye umutekano, ntiyigeze aherekezwa n’umugore we Kim Kardashian bimaze iminsi bivugwa ko bashobora kuba bagiye gutandukana nubwo byanyomojwe cyane n’abo mu muryango w’aba-Kardashians.

Kanye West abonanye na Donald Trump nyuma y’ibyumweru bibiri avuye mu bitaro yajyanywemo biturutse ku burwayi butunguranye yagize, yiyumvagamo umunabi n’intekerezo ze zaravaye ku murongo. Ku wa 18 Ugushyingo mbere y’uko ajyanwa mu bitaro, Kanye West yasoje igitaramo yakoreye muri San Jose avuga ko atatoye ariko ngo iyo ajya gutora yari guhitamo Donald Trump.

Uyu muraperi mu gitaramo yakoreye muri Sacramento ku munsi wa nyuma mbere y’uko ajyanwa mu bitaro, yaririmbye indirimbo enye zonyine afata umwanya wose w’igitaramo yibasira abantu batandukanye barimo umuryango wa Jay-Z bigeze kugirana umubano ukomeye, Mark Zuckerberg washinze Facebook ndetse na Hillary Clinton wari uhanganye na Donald Trump mu matora.

Kanye West mu mwaka ushize mu birori bya VMAs yavuze ko yifuza “kwinjira muri politiki” ndetse atangaza ko yifuza no “kwiyamamariza kuba Perezida wa Leta Zunze Ubumwe za Amerika muri 2020” gusa nyuma yo kubonana na Donald Trump yahise yiyongeza indi myaka ine avuga ko aziyamamaza muri 2024.

Hari amakuru avuga ko we n’umugore we badahuza imyumvire kuri Donald Trump cyane ko Kim Kardashian we yakunze kugaragaza ko yari ashyigikiye Hillary Clinton mu matora y’umukuru w’Igihugu. Byanagarutsweho nk’intandaro yo kuba Kanye West ataherekejwe na Kardashian ubwo yagendereraga Trump.

IBITEKEREZO