birashyushye

Nyuma y’inyungu idasanzwe  no gukunwa cyane  umuhanzi  Stromae yahagaritse muzika

Umubiligi ukomoka mu Rwanda, Stromae yafashe umwanzuro wo kuba asubitse kuririmba mu myaka iri imbere kugeza mu gihe kitazwi.

Stromae yahamirije ikinyamakuru Inrocks ko atacyiyumvamo ubushake bwo kuririmba, ngo yumva muri iki gihe yakwiha akanya ntiyongere gukora ibitaramo no gusohora indirimbo nshya ze ahubwo akaba mu muziki mu bundi buryo.

Yagize ati “Kuririmba, ndumva ntagifite ubushake bwo kubikora gusa umuziki sinzawureka […] Ndiyumvamo ko ngiye kwibanda cyane mu kwandika no gutunganya indirimbo nabwo bitari cyane. Nzakomeza nkore akazi kanjye abantu bamaze kunkorera, ariko nzabikorera abandi.”

Stromae yanzuye ko agiye kuba afashe ikiruhuko mu byo gukora indirimbo nyuma y’inyungu ikomeye no gukundwa cyane yabonye abikesha album ya Gatatu yasohoye kuwa 26 Kanama 2013.

people_stromae_10_reporters

Album Racine Carrée yayimuritse mu bihugu bitandukanye birimo n’u Rwanda. Yaje i Kigali kuwa 17 Ukwakira 2015, yari amaze kuririmbira mu bice bitandukanye byo ku Isi, aho yanyuze hose mu gihe kigera ku myaka ibiri yari amaze kwakirwa n’abafana 1.670.000 barimo Ababiligi 200.000. I Kigali yabonye abafana basaga gato ibihumbi 20 bityo ‘Racine carrée Tour’ yuzuza abantu 1.690.000 bitabiriye ibi bitaramo byose.

Stromae yamuritse album ye mu bihugu bitandukanye i Burayi, muri Afurika, muri Amerika nko muri Atlanta, Washington, Chicago, Boston, Minneapolis ho muri Leta ya Minnesota, San Francisco n’ahandi.

Igitaramo yakoreye i Kigali cyasoje uru rugendo, nyuma y’aho nta kindi gitaramo yakoze ndetse ntiyongera gusubira muri studio guhanga indirimbo nshya. Kuva icyo gihe kugeza ubu ‘atangaje ko yihaye umurongo mushya mu muziki’. Yagize ati “Ni wo murongo mushya mu myaka mike igiye kuza…”

Stromae aherutse kugira uruhare mu ifatwa n’itunganywa ry’amashusho y’indirimbo ‘Coward’ y’Umufaransakazi Yael Naim ufite inkomoko muri Israel. Stromae yavuze ko akibona iyi ndirimbo yayikunze by’ikirenga bityo asaba nyirayo ko yamufasha mu kazi ko kuyikorera amashusho igakundwa kurushaho.

Ati “Nyumvise hashize umwaka n’igice, nararize nkimara kuyumva. Nabivuze no mu kiganiro kandi Yael yarabibonye, yambajije niba nshaka kuyikorera amashusho…”

Stromae n’umugore we Coralie Barbier ubwo baheruka kwitabira Paris Fashion Week

Stromae yari amaze igihe mu kiruhuko nyuma yo kurushingana n’umugore we Coralie Barbier mu muhango wabaye kuwa 12 Ukuboza 2015 i Malines mu Ntara ya Antwerp mu Bubiligi. Aba bombi bari basigaye bibanda cyane mu byo gukora imideli kurusha umuziki.

Stromae amaze iminsi yibanda cyane mu guteza imbere imideli
Tanga Igitekerezo ukoresheje Facebook
Click to comment

Leave a Reply

Your email address will not be published. Required fields are marked *

Inkuru zikunzwe

To Top