Rubavu ikipe ya Rayon Sports ihatereye ibaba itsindwa na Etincelles

Ikipe ya Rayon Sports ntabwo yahiriwe n’urugendo rw’i Kigali-Rubavu aho yari yasuye Etincelles k’umukino w’umunsi wa 9 wa shampiyona warangiye iyi kipe ifite igikombe cya shampiyona itsinzwe igitego 1-0.

Ni igitego cyabonetse k’umunota wa 82 w’umukino gitsinzwe na Mumbele Saiba Claude nyuma yaho igice cya mbere cyari cyarangiye amakipe yombi anganya 0-0.

Rayon sports yari ifite abakinnyi 15 gusa kuri uyu mukino niyo yari yagerageje kwiharira umupira nubwo Etincelles yanyuzagamo nayo igakubagana imbere y’izamu.

Mu gihe barwanaga no kubonaigitego, abasore ba Karekezi Olivier bisanze aribo bagikubiswe mu minota ya nyuma, aha bahise bakaza umurego basatira bikomeye izamu rya Etincelles ariko abasore ba Ruremesha bagerageza guhagarara neza ari nako batinza umukino mu buryo butashimishaga na gato Karekezi n’abasore be bari bari ku gitutu cyo kwishyura.

Byaje guhumira k’umurari ubwo Djabel Manishimwe ahagana mu minota ya nyuma y’inyongera yabonye ikarita itukura asohorwa mu kibuga nyuma yo gutera inkokora Hakim.

Muri uyu mukino Rayon sports imaze gukina imikino 3 mu minsi itarenze 10, yari ifite abasimbura bane gusa barimo umuzamu Ndayisenga Khasim na ba myugariro 3 aribo Manzi Thierry, Irambona Eric na Nyandwi Sadam. Mu gihe abakinnyi 11 batangiye uyu mukino ari: Ndayishimiye Eric (Bakame), Mugabo Gabriel, Usengimana Faustin, Mutsinzi Ange, Rutanga Eric, Nova Bayama, Niyonzima Olivier Sefu (wavunitse k’umunota wa 19 asimburwa na Nyandwi Sadam), Yannick Mukunzi, Manishimwe Djabel, Bimenyimana Bonfils Caleb(yasimbuwe na Irambona Eric 46’) na Tidiane Kone.

Rayon Sports ihise iguma ku mwanya wa 5 n’amanota 14 inganya na Mukura VS yo yatsinze umukino yari yakiriyemo Gicumbi(2-0) mu gihe Etincelles yo ihise izamuka ku mwanya wa 7 n’amanota 13, ariko Rayon sports ikaba igisigaranye umukino umwe w’ikirarane.

IBITEKEREZO