umuhanzi Don William yitabye Imana

Umuririmbyi Don Williams wamamaye mu njyana ya Country wo muri Amerika (USA), yitabye Imana nyuma y’igihe gito yari amaze arwaye.

Mu ijoro ryo kuri uyu wa Gatanu tariki 8 Nzeri 2017 ni bwo amakuru y’urupfu rwe yatangiye gusakara mu bitangazamakuru byo muri Amerika aho uyu muhanzi akomoka ndetse yari anatuye.

Don Williams, yari ufite imyaka 78, mbere yo kwitaba Imana yari yaramaze gutangaza ko avuye burundu mu byo kuririmba ibi akaba yarabitangaje muri 2016. Ni umwe mu baririmbyi b’injyana ya Country bamamaye ku Isi kubera indirimbo se zakunzwe n’abatari bake cyane cyane kubera ijwi rye.

don williamsDon Williams yitabye Imana ku myaka 78

Don Williams amateka yo kwamamara kwe asa n’ayatangiye ubwo yaririmbaga mu itsinda ryitwa Pozo Seco Songers ryamenyekanye mu myaka ya 1960. Icyakora yaje kurivamo afata icyemezo cyanamuhiriye cyo kuririmba wenyine ku giti cye, aha akaba yarakoze nyinshi mu ndirimbo zamamaye ndetse zikamamaza izina rye nka; I believe in you, You’re My Best Friend,Tulsa Time, Good ole boys like me ndetse n’izindi nyinshi zamamaye.

Don Williams ni umwe mu baririmbyi bake b’injyana ya Country bakoreye ibitaramo muri Afurika. Mu mwaka wa 1997 yashyize hanze DVD yitwa “Into Africa” yafatiye i Harare muri Zimbabwe ubwo yahakoreraga igitaramo. Don Williams ni umuhanzi wavutse tariki 27 Gicurasi 1939, avukira muri Texas ho muri Leta Zunze Ubumwe za Amerika bivuze ko yitabye Imana afite imyaka 78.

IBITEKEREZO