Umukunzi wa Humble Jizzo yakorewe ibirori bya “Baby Shower”

Humble Jizzo wo muri Urban Boyz n’umukunzi we bakoze ibirori bya “Baby Shower” mu kwitegura umwana bagiye kubyarira muri Leta Zunze Ubumwe za Amerika aho bagiye kumara ukwezi berekeje.

Mu mpera z’Ukwakira 2017 nibwo Humble Jizzo na Blauman batangaje ko bitegura kwakira imfura yabo y’umukobwa ari nabyo byatumye bafata umwanzuro wo guhagarika ubukwe bagombaga gukora mu Ukuboza 2017.

Aba bombi bahagurutse ku Kibuga Mpuzamahanga cy’Indege cya Kigali berekeza muri USA ku mugoroba wo ku wa 15 Ukuboza 2017. Humble Jizzo yavuze ko bajyanyweyo no kwiyerekana mu muryango ndetse no kuhabyarira imfura yabo.

Nyuma y’ibyumweru bitatu berekejeyo, umukunzi wa Humble Jizzo yakorewe ibirori bya “Baby Shower” ahabwa impano zitandukanye n’abo mu muryango we mu myiteguro y’umwana bagiye kwibaruka.

Humble Jizzo yanditse kuri Instagram ati “Ubuzima bushya bugiye kuvuka ni impamvu yo kwishima. Turashima buri wese ku bw’urukundo rudasanzwe no kudushyigikira mu birori byo kwitegura igice cyanjye na Amy Blauman vuba aha. Imana ihe umugisha usendereye buri wese.”

Ibirori byo kwitegura umwana w’umukobwa Humble Jizzo n’umukunzi we bagiye kwibaruka byitabiriwe n’abo muryango wa Amy Blauman barimo babyara be babahaye impano zitandukanye aho batuye mu Mujyi wa Wenatchee wo muri Leta ya Washington.

Urugendo rwa Humble Jizzo na Amy Blauman muri USA rwabimburiwe n’iminsi itatu bamaze i New York mbere yo kwerekeza aho bagiye gutura. Ashyenga, yavuze ko ngo yahoraga yifuza kuhagera mu bihe by’ubukonje akabasha kwibonera urubura rutinywa na benshi mu nshuti bamutanzeyo.

Humble Jizzo yavuze ko gahunda z’umuryango yagiyemo muri Leta Zunze Ubumwe za Amerika nizirangira azagaruka mu Rwanda ndetse ashimangira ko zitazatuma itsinda rya Urban Boyz risenyuka kuko yabanje kugirana igihe cyihariye na Nizzo barisigaranyemo bakaganira imikorere igomba kuriranga no mu gihe adahari.

Humble Jizzo na Amy Blauman bishimiye umukobwa bagiye kwibaruka

Ibirori bya ‘Baby Shower’ byakorewe umukunzi wa Humble Jizzo byitabiriwe n’abo mu muryango we barimo na babyara be

Humble Jizzo na Amy Blauman bamaranye imyaka itatu mu munyenga w’urukundo

Tanga Igitekerezo ukoresheje Facebook

IBITEKEREZO