Visi Perezida wa Rayon Soprt Gaciya Urukiko rwemeje ko aba afunze by’agateganyo iminsi 30

Kuri uyu mugoroba, Urukiko rw’Ibanze rwa Nyarugunga rutegetse ko rwiyemezamirimo Gacinya Chance Denis akomeza gufungwa by’agateganyo iminsi 30. Uyu akurikiranyweho ibyaha birimo kubeshya uwo mugiranye amasezerano mu bijyanye n’isoko ry’ibikorwa remezo no gukora no gukoresha inyandiko mpimbano.Gacinya Denis yavuzwe no mu kibazo nk’iki mu karere ka Gatsibo Gacinya Denis yavuzwe no mu kibazo nk’iki mu karere ka Gatsibo

Akurikiranywe ku masezerano yagiranye n’Akarere ka Rusizi agashinjwa ko yishyuwe amafaranga ntarangize imirimo.Mu iburanisha rishize, Umushinjacyaha agendeye kuri raporo z’umugenzuzi mukuru w’imari ya Leta za 2014-2015 n’iya 2015-2016 zigaragaza ko Gacinya yahombeje Leta amafranga menshi muri iri soko kuko nyuma ye ryahawe abandi bakarikora ku mafaranga macye bakarirangiza.

Umucamanza avuga ko ibikubiye muri raporo y’umugenzuzi mukuru w’imari ya Leta na REG/Rusizi bigaragaza ko Denis Gacinya yishyuwe Miliyoni 495 kandi imirimo yo kuzana no gushinga amapoto yari igeze kuri 87%, naho amatara yashinze yarakaga ku kigero cya 50,42% bityo ko muri ayo yishyuwe Miliyoni 242 atagombaga kwishyurwa.

Mu kwiregura kwe mu iburanisha riheruka Gacinya yari yavuze ko ahubwo Akarere ariko kamushyizeho igitutu akagakora ibitari biteganyijwe mu masezerano ndetse ko yakareze mu rukiko rw’ubucuruzi n’ubu urubanza ruri kuburanwa.

Uyu munsi umucamanza avuga kanddi ko iyi raporo y’umugenzuzi w’imari ya Leta igaragaza ko ‘facture’ zakozwe na Gacinya Denis ubwe yishyuza aya mafaranga kandi yari abizi neza ko imirimo ye itarangiye bityo ko ari impamvu zikomeye zituma akekwa ko yakoze icyaha cyo gukora no gukoresha inyandiko mpimbano.

Umucamanza avuga ko ibi bimemyetso bigize impamvu zikomeye zituma uregwa akekwa ko yakoze icyaha cyo kuba ikitso cyo gutanga inyungu zidafite ishingiro mu gihe cyo gutanga isoko n’icyaha cyo kubeshya uwo mwagiranye amasezerano.

Urukiko uyu munsi rwanzuye ko Gacinya akomeza gufungwa kuko ibyagezweho mu iperereza ku byaha bitatu akurikiranyweho bigize impamvu zihagije zituma akekwa ko yakoze ibi byaha kandi ibyo aregwa bihanishwa igifungo kiri hejuru y’imyaka ibiri.

Mu isomwa ry’uru rubanza uruhande rw’uregwa nawe ubwe ntibari bahari. Gusa bafite iminsi itanu nibura yo kujuririra iki cyemezo cy’urukiko rw’ibanze.

Gacinya Denis mu iburanisha rishize ari kumwe n’umwunganizi weGacinya Denis mu iburanisha rishize ari kumwe n’umwunganizi we

Mu kwezi kwa Nzeri umwaka ushize Komisiyo ishinzwe gukurikirana imikoreshereze y’imari n’umutungo bya Leta mu Nteko Ishinga Amategeko yasabye ko Ubushinjacyaha bukurikirana Dennis Gacinya wagiye uhabwa amasoko ya Leta nk’uhagarariye kompanyi yitwa MICON akishyurwa n’Akarere ka Rusizi amafaranga arenze ibikorwa yakoze nko kuba aka karere karamwishyuye miliyoni 495 nyamara igenagaciro ry’imirimo yari yakoze ryaragarageje ko ikwiye miliyoni 253Frw.

Icyo gihe Hon Nkusi Juvenal uyobora PAC yavuze ko iyi Komanyi ya Denis Gacinya atari ubwa mbere igarutsweho muri ibi bikorwa kuko no ku wa mbere yari yaje kwisobanura ku bibazo afitanye n’akarere ka Gatsibo.

Icyo gihe ariko abayobozi b’Akarere ka Rusizi bemeye amakosa yabayeho mu kumwishyura gusa bavuga ko uyu rwiyemezamirimo bamubuze ngo afatwe aryozwe aya makosa.

Ibisobanuro kitanyuze abadepite bagize PAC, bavuze ko uyu Gacinya ntaho yaburiye ahubwo ko aba bayobozi bakomeje kumukingira ikibaba ku bushake.

Tanga Igitekerezo ukoresheje Facebook

IBITEKEREZO