Mu gihe abanyarwanda bari kwitegura kwizihiza umunsi w’Intwari z’Igihugu Karisimbi events Imaze kumenyakana hano mu Rwanda mu gutegura ibirori bitandukanye yateguye ibitaramo bizazenguruka igihugu bigamije gushimangira indangagaciro z’ubutwari, ubumwe n’urukundo rw’igihugu, binyuze mu muziki n’umuco nyarwanda yise Ubutwari Tour 2026
Ibi bitaramo byatumiwemo abanyabigwi mu muziki Gakondo nka Mama Mariya Yohana , Muyango na Sofia Nzayisenga bizaba bifite insanganyamatsiko igira iti “Ubutwari n’Ubumwe bw’Abanyarwanda, inkingi z’iterambere”.
Mu kiganiro na Mugisha Emmanuel Umuyobozi Mukuru wa Karisimbi Events iri gutegura ibi bitaramo yadutangarije y’uko bateguye ibi bitaramo mu rwego rwo gukomeza guha icyubahiro intwari z’u Rwanda binyuze mu ndirimbo gakondo ndetse n’abahanzi nyarwanda
Ubutwari Tour 2026’ iteganyijwe kuzenguruka intara zitandukanye z’igihugu mu mpera z’ukwezi kwa Mutarama 2026.
Biteganyijwe ko izatangirira i Nyanza ku wa 17 Mutarama, ikomereze i Musanze ku wa 24 Mutarama, i Nyagatare ku wa 23 Mutarama, i Rubavu ku wa 30 Mutarama, isorezwe i Kigali ku wa 31 Mutarama 2026. Ibi bitaramo bizabanziriza Umunsi w’Intwari wizihizwa buri mwaka tariki ya 1 Gashyantare.
Umuhanzi w’icyubahiro muri ibi bitaramo ni Mariya Yohana, uzwi cyane nk’umwe mu bagore bagize uruhare rukomeye mu kubaka umuziki wubakiye ku muco n’indangagaciro nyarwanda. Azifatanya na Muyango, umwe mu bahanzi bakunzwe cyane kubera indirimbo zifite ubutumwa bwimbitse ku bumwe, amateka n’ubutwari bw’Abanyarwanda.
Aba bahanzi bazahurira ku rubyiniro n’abandi barimo Sofia Nzayisenga ndetse n’abahanzi b’aho ibitaramo bizabera bazajya batumirwa, hagamijwe guteza imbere impano zo mu ntara no guha urubyiruko amahirwe yo kugaragaza ubushobozi bwarwo.
Ibi bitaramo kandi bizarangwa n’ibiganiro n’ibikorwa by’umuco bigaruka ku mateka y’u Rwanda, uruhare rw’Intwari mu kubohora igihugu no kubaka ubumwe bw’Abanyarwanda. Abategura iki gikorwa bashimangira ko “Kwinjira ni ubuntu”, bityo abaturage bakazagira amahirwe yo kwitabira ibi bitaramo nta kiguzi.
