Papa Francis yasubitse inama kubera ibicurane

Umushumba wa Kiliziya Gatolika ku Isi, Papa Francis yasubitse inama yagombaga kugirana na bamwe mu bayobozi ba Kiliziya kubera indwara y’ibicurane.

Iyi nama yagombaga kuba ku wa Gatandatu tariki 24 Gashyantare mu 2024, ariko Ibiro bishinzwe itumanaho i Vatican biza gusohora itangazo bivuga ko itakibaye, kuko Papa Francis afite ibicurane. Iyi nama yagombaga guhuza Papa n’Abadiyakoni b’i Roma.

Vatican yavuze ko impamvu z’iki cyemezo ari ukwirinda kwa Papa no kurinda abandi ashobora kwanduza.

Ntabwo ari ubwa mbere ibicurane bitumye Papa Francis asubika gahunda ze, kuko no mu 2020 yahagaritse umwiherero w’amasengesho yateganyaga kugirira mu Majyepfo y’i Roma kubera iyi ndwara.