Tour du Rwanda iri gukinwa ku nshuro ya 10. Kuva yabaye mpuzamahanga muri 2009 ni inshuro ya mbere abayitabiriye bakinnye etape imwe ya 199Km. Yari indyankurye ku bakinnyi n’ibyishimo ku bafana.
Hadi Janvier wari umaze imyaka itatu atitabira Tour du Rwanda yagarukanye imbaraga
Wari umunsi ugoye ku bakinnyi bahagurutse mu Rwabuye mu mugi wa Huye saa mbiri n’igice z’igitondo bakanyura i Save na Rubona, Rusatira n’i Nyanza ku bigega, ku Gasoro na Gatagara bakinjira muri Ruhango za Kigoma bagahita Ku Ntenyo kwa Mirenge, Ku mugina w’imvuzo, k’Umujyajyaro na Kirengeri bakinjira i Muhanga muri Rugeramigozi.
I Muhanga bataye umuhanda wa Kigali basohoka mu mugi wa Muhanga bagana mu Meru bafata za Kabadaha na Rugendabari binjira mu muhanda wa Ngororero mu gace k’iburengerazuba k’imisozi miremire.
Barazamuka ku Cyome bafata ku Cyapa binjira muri centre ya Ngororero, bakomeze kuri Byungu banyura Rugarambiro na Rurambo bazamuka Kabaya basohokera mu karere ka Nyabihu.
Bahingukiye ku Gitebe na Giciye bafata Rambura ya Gasiza bazamuka ku Mukamira maze aho gukata ibumoso bajya za Jenda na no kuri Kora ujya i Rubavu bakata iburyo bazamuka Sodeparal no mu Rwankeri bamanuka mu Byangabo na Busogo maze bashunguka cyane binjira mu mugi wa Musanze.
Nta gushidikanya ko amagare ari wo mukino bwite (umuntu umwe) uvunanye kurusha indi, aba basore basiganwe banyonga ubutavaaho amasaha hafi atandatu yose, bageze i Musanze hafi saa munani bacitsemo ibice.
Ku nzira ariko bashyigikiwe cyane, cyane cyane abasore bagize ikipe y’u Rwanda na Hadi Janvier wahabwaga ikaze nanone muri Team Rwanda.
Uyu munsi ntiwahiriye umukinnyi wo mu Rwanda ngo atware iyi ntera ariko muri rusange bagumye ku isonga na Mugisha Samuel, aya ni amwe mu mafoto ya none….
Mbere yo guhaguruka umutima uba uri ku kazi, na bashiki babo bati “courage”
Mbere yo guhaguruka umutima uba uri ku kazi
Abakinnyi bageze i Save y’abazungu bamaze gucikamo ibice bibiri
Abakinnyi b’abera bakinira Team Embrence yo mu Budage, POC Cote de la lumiere yo mu Bufaransa bakoresheje imbaraga nyinshi uyu munsi
Abana bo muri Ngororero bahitagamo kwirukanka inyuma y’amagare banafana, ariko amaguru yabo ntakomeye nk’amapine n’amaguru y’abanyonga bahitaga bacogora bakoze akabo ko gufana
Yari intera yiganjemo imisozi miremire aha mu burengerazuba muri Ngororero na Nyabihu
Adrien Niyonshuti na Hadi Janvier bari imbere mu karere ka Muhanga
Umudage Hellmann Julian (wa 2 imbere) yatangiye gucomoka mu bandi barenze ku Kibihekane basatira Mukamira muri Nyabihu
I Nyabihu abafana ba Team Rwanda na Benediction Club bahaye ikaze Hadi Janvier wari umaze igihe atitabira iri siganwa
Ku Mukamira baba bashyigikiye umuhungu wabo Mugisha Samuel
Abayobozi ba Komite Olempike, Festus Bizimana na Valens Munyabagisha bari mu bakomeje gukurikirana iri siganwa
Lozano Riba na Doring Jonas baje imbere kuri etape y’uyu munsi bakoranye ibilometero byinshi
Kubona umwanya mu isoko rya Musanze aho uba witegeye aho basorezwaga byari ingorabahizi
Hellmann Julian niwe wegukanye etape ya 3 ya Tour du Rwanda
Ku mwanya wa 2 na 3 haje LOZANO RIBA David na Beneke Calvin
Ndayisenga yakoresheje imbaraga nyinshi ashaka kwegukana iyi etape ariko ntibyamukundira asoreza ku mwanya wa gatanu
Nyuma yo kunyonga ibilometero hafi 200, Mugisha Samuel yahagaze ashinyiriza ariko ntiyemera gusigwa amasegonda menshi na Hailemaichael Mulu (ubanza ibumoso) wa gatatu ku rutonde rusange
Miss Rwanda 2018 Iradukunda Liliane ari mu baje gufana uyu mukino
Nubwo Mugisha Samuel atatsinze intera ya none, yagumanye Maillot Jaune
Hailemaichael Mulu yongeye guhembwa nk’urusha abandi mu misozi
