Ariel Wayz yakomoje ku rukundo rwe na Juno Kizigenza mu ndirimbo ye nshya yise Good Luck

Akomoza ku ndirimbo ye nshya ‘Good luck’, Ariel Wayz wahishuye ko afite umukunzi mushya, yifurije ishya n’ihirwe uwahoze ari umukunzi we Juno Kizigenza baherutse gutandukanira mu nduru.

Kuva mu Ukuboza 2021, urukundo rwa Juno Kizigenza na Ariel Wayz rwatangiye kuzamo umwuka mubi ndetse mu minsi mike bahamya ibyo gutandukana kwabo kwaherekejwe no guterana amagambo kutamaze igihe.

Nyuma y’iminsi mike baterana amagambo, intambara yabo ku mbuga nkoranyambaga yaje guhosha nk’icyemezo cyabo nyuma yo gusanga bidakwiye ko batandukanira mu nduru.
Nyuma yo kwemera ko yamaze gutandukana na Juno Kizigenza, Ariel Wayz yatangiye gukora indirimbo yise ‘Good luck’ amwifuriza kuzahirwa mu buzima bw’urukundo rushya yazabona.

Muri iyi ndirimbo Ariel Wayz yumvikana abwira Juno Kizigenza ko nubwo batandukanye batagikundana ariko nta mutima mubi amufiteho ndetse amwifuriza guhirwa.

Mu kiganiro yahaye kimwe mu binyamakuru bya hano mu Rwanda ubwo yari abajijwe niba koko iyi ndirimbo nshya yarayikoreye Juno Kizigenza, Ariel Wayz ntabwo yigeze aca ku ruhande yahamije iby’aya makuru. Ati “Niwe rwose, nta wundi muntu twakundanye ngo bimenyekane.”

Uyu muhanzikazi udatinya guhamya ko afite umukunzi mushya, yavuze ko nta byinshi yavuga ku rukundo rwe na Juno Kizigenza yewe ko atanifuza guhishura byinshi ku mukunzi we mushya.

Ku rundi ruhande, Ariel Wayz avuga ko uretse akazi nta kindi kintu agitindaho mu rukundo rwe na Juno Kizigenza.

Ati “Nyuma y’ibyabaye njye na Juno Kizigenza twemeranyije ko nk’uko twari twaracecetse urukundo rwacu tudakwiye no gukomeza kuvuga ku itandukana ryacu.”

Ku rundi ruhande, Ariel Wayz avuga ko ubutumwa bwinshi yifuzaga guha Juno Kizigenza buri muri iyi ndirimbo ye nshya.
Ati “Mba mwifuriza gukundana na we, ntazaheranwe n’agahinda, nizere ko agikunda nk’uko nanjye nkunda.

Namubwiraga ko njye niteguye kongera gukundana bundi bushya, ari na byo na we mwifuriza.”

‘Good luck’ ni indirimbo nshya ya Ariel Wayz avuga ko yatangiye kwandika muri Gashyantare 2022, nyuma yo gutandukana na Juno Kizigenza.

Iyi ndirimbo mu buryo bw’amajwi yakozwe na Santana muri Hi5 Records mu gihe amashusho yayo yafashwe anatunganywa na Gad umwe mu basore bagezweho muri iyi minsi.

423 total views, 1 views today

Facebook Comments
Share Button

Subscribe now

k

auto ads

Recommended For You

About the Author: Jean Paul Nsanzabera

Leave a Reply

Your email address will not be published.