Google yiyemeje gutanga miliyoni 800$ zo gufasha kurwanya COVID-19

Google yiyemeje gutanga miliyoni zirenga 800$ zo gufasha abacuruzi, imiryango ndetse n’abakora mu rwego rw’ubuzima, nka kimwe mu bikorwa byayo byo guhangana n’ingaruka za Coronavirus.

Iyi nkunga izifashishwa mu gukora ibikoresho byo kwa muganga byifashishwa mu kurwanya Coronavirus ndetse no gufasha ibigo n’imiryango gutambutsa ubutumwa bwerekeye kurwanya iki cyorezo.

Iki kigo cy’ikoranabuhanga cyatangaje ko kizagenera Ishami ry’Umuryango w’Abibumbye ryita ku buzima (OMS), ndetse n’ibigo bya za leta miliyoni zigera kuri 250$ nk’inkunga yo kwamamaza ibikorwa, zivuye kuri miliyoni 25$ yari yiyemeje mu byumweru bishize.

Umuyobozi Mukuru wa Google, Sundar Pichai, kuwa Gatanu yatangaje ko iyi nkunga izanyura mu gufasha ibigo n’imiryango gusangira amakuru ajyanye n’uburyo bwo kurwanya ikwirakwira rya Coronavirus, binyuza mu kuyatangaza nta kiguzi gihawe Google.

Izindi miliyoni 340$ zizagenerwa ibigo bito n’ibiciriritse, bifite konti zabyo kuri Google, zikora nibura kuva mbere y’umwaka ushize naho izindi miliyoni 20$ zigenerwe amatangazo ku bufasha bugenewe ibigo bito.

Google ni kimwe mu bigo byinshi by’ikoranabuhanga bishyira akayabo ndetse n’ubufasha mu bya tekiniki mu kurwanya icyorezo cya Coronavirus.

Kuwa Gatanu w’icyumweru gishize, Apple, yashyizeho urubuga ndetse na Application ya iOS, bifasha abantu kwisuzuma ibimenyetso bya Coronavirus, nyuma y’uko yari yatangaje ko izatanga miliyoni zirenga 10 z’udupfukamunwa muri Leta zunze Ubumwe za Amerika n’u Burayi.

Facebook nayo yahaye OMS n’ibindi bigo inkunga yo kwamamaza ku buntu kugira ngo bitange amakuru nyayo kuri Coronavirus, gusa OMS nta tangazo na rimwe irashyira kuri uru rubuga.

OMS ariko irakorana na Facebook mu bundi buryo burimo nk’Ikigo cyayo cyo gusangira amakuru kuri Coronavirus, ndetse no kuri konti ya Whatsapp itangirwaho amakuru mu bijyanye n’ubuzima yatangijwe umwaka ushize.

Ibindi bigo by’ikoranabuhanga nka SoftBank (SFTBF) yo mu Buyapani na Alibaba yo mu Bushinwa, byiyemeje gutanga nibura miliyoni y’udupfukamunwa buri kimwe, ku bakozi b’urwego rw’ubuzima muri Amerika.

Uretse gutanga ubufasha bwo kwamamaza, Google irateganya no gukora ikigega cy’ishoramari cya miliyoni 200$ kikazafasha ibigo bito by’ubucuruzi kubona igishoro. Hari kandi no guha miliyoni 20$ abahanga n’abashakashatsi mu kurwanya Coronavirus.

Google kandi irimo gukorana na Magid Glove&Safety, mu gukora udupfukamunwa miliyoni eshatu mu byumweru biri imbere, tukazahabwa ikigo cyo kurwanya indwara muri Amerika.

 467 total views,  1 views today

Facebook Comments
Share Button

k

auto ads

Recommended For You

About the Author: Jean Paul Nsanzabera

Leave a Reply

Your email address will not be published. Required fields are marked *