Hosni Mubarak wabaye Perezida wa Misiri – akaza guhirikwa n’igisirikare mu mwaka wa 2011 – yitabye Imana kuri uyu wa Mbere aguye mu murwa mukuru Cairo, ku myaka 91.
Mubarak yabaye Perezida wa Kane wa Misiri guhera mu 1981, amara imyaka 30 ku butegetsi kugeza ku nkundura y’impinduka yabaye mu barabu, ituma ahirikwa ku butegetsi.
Yaje gutabwa muri yombi ndetse mu 2012 akatirwa gufungwa burundu nyuma yo guhamwa no kugira uruhare mu kwica abigaragambya 239. Igifungo yakatiwe cyaje gukurwaho, agirwa umwere, arekurwa muri Werurwe 2017.
Gusa mu 2015, Mubarak n’abahungu be babiri bahamijwe ibyaha byo kunyereza umutungo wa leta bakawukoresha mu nyungu z’umuryango wabo. Bakatiwe gufungwa imyaka itatu.
Mubarak yasimbuwe na Mohamed Morsi watowe n’abaturage, ariko ntiyamazeho kabiri kuko mu 2013 yahiritswe ku butegetsi na General Abdel Fattah el-Sisi wari Umugaba w’Ingabo, nyuma y’imyigaragambyo, ari na we ubu uyoboye Misiri.
