ibitaramo bya Rwandan Music first byatangiriye I Rusizi aho abahanzi bishimiwe byo kurwego rudasanzwe (Amafoto)

 

Mu ijoro ryo kuri uyu wa 11 Kanama 2018, mu Mujyi wa Rusizi habereye igitaramo cy’imbonekarimwe cyahurije hamwe abahanzi batandukanye bakomeye bo mu Rwanda, bagaragarijwe urukundo rudasanzwe n’abafana.

Iki cyari igitaramo cya mbere mu bitaramo birindwi bizazenguruka u Rwanda, mu bukangurambaga bwiswe Rwandan Music First, bugamije gukundisha abanyarwanda umuziki wabo, kuruta uko bararikira uw’abanyamahanga nyamara ntacyo baturusha.

Iki gitaramo cyari cyitabiriwe n’abahanzi bamaze kubaka amazina nka PFLA, Safi Madiba, Ama G The Black, Mico The Best na Asinah Erra.

Abanyarusizi bari babukereye, ndetse bitabiriye ku rugero rushimije, aho benshi bari amatsiko yo kwirebera ibyo byamamare babona ku mashusho, ariko bikaba gake imbonankubone.

Nk’uko biri mu ntego z’iki gitaramo, abahanzi batandukanye bakomoka muri aka gace bahawe umwanya berekana impano zabo kandi bishimiwe. Abo barimo uwitwa Javanix, Mirror, Apotre Ruhatiriza, n’itsinda rya The Yego rifite indirimbo ikunzwe cyane yitwa ‘Inshuti Ye’.

Uko amasaha yagiye yicuma niko bakomeje kugenda bagaragaza amashyushyu yo kubona abahanzi bandi bari baturutse mu Mujyi wa Kigali. MC Iras Jalas na Masunzu babajije abafana umuhanzi bashaka ko abimburira abandi maze bose batera hejuru basaba Asinah.

Uyu mukobwa ntiyabatengushye, nawe yaje abaririmbira indirimbo ze zo mu njyana ya Dance Hall, bamwereka urukundo rudasanzwe ku buryo yavuze ko yatunguwe n’uburyo yakiriwe n’abafana mu gitaramo cye cya mbere yari akoreye mu ntara.

Ama G The Black nawe yakurikiyeho ibintu bikomeza kuryoha. Uyu mugabo waherukaga i Rusizi muri 2014 abafana be bamweretse ko ibihangano bye babikunda dore ko baririmbanaga kuva ku ya mbere kugera ku ya nyuma.

Nyuma ya Ama  G The Black hakurikiyeho Mico The Best wabanjirije Safi Madiba. Nta gushidikanya ko bari mu bafite abafana benshi muri Rusizi, bitewe n’ibyo baraye bagaragaje.

PFLA wagizwe ambasaderi wa Rwandan Music First, ni we wasoje iki gitaramo. Uyu musore ufite inkomoko n’ubundi muri Rusizi bwari ubwa mbere ahataramiye. Birumvikana ko yari afitiwe amashushyu n’abantu benshi bamukunze ndirimbo ze ziganjemo amagambo akarishye.

PFLA yaririmbaga cyane  akoresheje ijwi rye ryonyine (free style), ubundi akanyuzamo akaganiriza abafana be. Yagaragaje agahinda amaranye igihe ko kuba abahanzi b’abanyamahanga bahabwa agaciro kurusha abo mu Rwanda, asaba ko bigomba guhagarara kuko abahanzi bo mu Rwanda bashoboye.

Abafana batashye bagaragaza ko bari bakinyotewe, ndetse basaba ko ibi bitaramo byajya bitegurwa kenshi. Igitaramo gitaha kizabera i Nyagatare.

309 total views, 1 views today

Facebook Comments
Share Button

Subscribe now

k

auto ads

Recommended For You

About the Author: Jean Paul Nsanzabera

Leave a Reply

Your email address will not be published.