Umuryango Giants of Africa washinzwe na Masai Ujiri, ufatanyije na Jaha Dukureh, wafunguye ikibuga cya 54 cya Basketball ku mugabane wa Afurika, giherereye mu gace ka Jimara muri Gambia. Iki kibuga cyubatswe mu rwego rwo guteza imbere siporo, guha urubyiruko amahirwe yo kugaragaza impano zarwo no gushyiraho umwanya uhuza abagore n’abandi baturage.
Umuryango udaharanira inyungu wa Giants of Africa washinzwe na Masai Ujiri, wamaze gushyira ikindi kimenyetso mu rugendo rwo guteza imbere Basketball muri Afurika, nyuma yo gufungura ikibuga gishya kiri mu gace ka Jimara, mu Ntara ya Upper River muri Gambia.
Iki kibuga cyafunguwe ku wa Gatandatu tariki ya 7 Ugushyingo 2026, kikaba ari icya 54 uyu muryango umaze kubaka ku mugabane wa Afurika, mu rwego rwa gahunda yawo yiswe Built Within, igamije kubaka ibibuga 100 bya Basketball mu bihugu bitandukanye bya Afurika.
Uyu mushinga washyizwe mu bikorwa ku bufatanye na Jaha Dukureh, Ambasaderi w’Umuryango w’Abibumbye ushinzwe guteza imbere uburinganire n’uburenganzira bw’abagore muri Afurika (UN Women Goodwill Ambassador for Africa), akaba n’uwashinze ikigo Jaapo Capital Company Ltd.
Umuhango wo gufungura iki kibuga witabiriwe n’abayobozi batandukanye muri Gambia, barimo Minisitiri w’Ubucuruzi, Kwishyira hamwe kw’uturere n’Akazi, Mod K Ceesay, Guverineri w’Intara ya Upper River, Samba Bah, ndetse n’umuyobozi w’akarere ka Jimara, Julaba Drammeh.
Iki kibuga cyahawe izina rya Jimara Hope Court, risobanura ikibuga cy’icyizere. Cyatekerejweho nk’ahantu hazajya hakorerwa ibikorwa bya siporo, ariko kandi kikaba umwanya wo guhuriza hamwe abaturage, cyane cyane urubyiruko n’abagore bo muri ako karere.
Abagore bo mu bice bitandukanye by’Intara ya Upper River bazajya bahasanga umwanya wo guhura, kuganira, kungurana ibitekerezo no kubona amahirwe yo kwigira ku bandi binyuze mu bikorwa byo kubafasha kwiteza imbere.
Abana n’urubyiruko na bo bazajya bahakorera imyitozo ya Basketball, amahugurwa yihariye n’ibindi bikorwa bigamije kubafasha guteza imbere impano zabo no kugira ubumenyi buzabafasha mu buzima.
Jaha Dukureh yavuze ko iki gikorwa gifite igisobanuro kirenze kubaka ikibuga cyo gukiniraho Basketball, kuko ari intangiriro y’icyerekezo kigari cyo guha urubyiruko amahirwe yo kwiga, kwihugura no guteza imbere impano zarwo.
Yagize ati: “Abana benshi bo muri Jimara ntibari barigeze bafata umupira wa Basketball, tutibagiwe no kubona ikibuga cyo gukiniraho. Uyu munsi, binyuze mu bufatanye bwacu na Giants of Africa, turi guhindura iyo miterere.”
Yakomeje avuga ko iki kibuga ari ikimenyetso cy’icyizere n’amahirwe, ndetse ko ari intambwe ya mbere mu cyerekezo cyo gushyiraho ahantu hazajya hatangirwa ubumenyi n’amahugurwa, hagamijwe gufasha urubyiruko kwagura ubushobozi no kugera ku nzozi zarwo.
Yashimiye Masai Ujiri n’itsinda rya Giants of Africa kuba baragize uruhare mu gushyigikira uyu mushinga no kwizera ubushobozi bw’abaturage ba Jimara.
Masai Ujiri, washinze Giants of Africa, yavuze ko kuba uyu muryango ugeze muri Gambia ku nshuro ya mbere ari ikintu gifite igisobanuro cyihariye, cyane cyane bitewe n’icyerekezo Jaha Dukureh afite cyo guteza imbere abaturage bo muri Jimara.
Yashimangiye ko bishimiye kuba baragize uruhare mu gushyigikira uwo mushinga, anagaragaza icyizere ko ikibuga cya Jimara kizaba umusingi wo guhuza abaturage no gufungurira urubyiruko amahirwe mashya.
Yagize ati: “Kuba tugeze muri Gambia ku nshuro ya mbere ni ikintu cyihariye kuri twe. Jaha, inshuti yacu magara, arimo kubaka amahirwe mashya muri Jimara, kandi twishimiye kuba turi mu bafasha gushyira mu bikorwa icyerekezo afite kuri aka karere.”
Yakomeje agira ati: “Twifuza ko ikibuga cya Jimara Hope kizazana ibyishimo, kigahuza abaturage, kandi kigafungurira urubyiruko amarembo y’amahirwe, cyane cyane abakobwa n’abagore.”
Ikibuga cya Jimara cyubatswe ku bipimo n’amahame ya FIBA, ariryo Ishyirahamwe Mpuzamahanga ry’Umukino wa Basketball.
Umwihariko w’uyu mushinga ni uko utagize uruhare gusa mu kongera ibikorwaremezo bya siporo, ahubwo wanatanze amahirwe y’akazi n’ubumenyi ku baturage baho.
Abakozi bo muri ako karere bagize uruhare mu iyubakwa ryacyo, mu gihe urubyiruko rwo muri Jimara rwahawe amahugurwa kandi rugahabwa akazi mu gihe imirimo yo kucyubaka yakorwaga.
Iki ni kimwe mu bintu Giants of Africa ishyira imbere muri gahunda yayo, aho buri kibuga kitagomba kuba ahantu ho gukinira gusa, ahubwo kigomba no kugira uruhare mu iterambere ry’abaturage bagituye hafi.
Iki kibuga kizajya cyakira amahugurwa ya Basketball, amasomo yo gutoza uyu mukino, amarushanwa n’ibindi bikorwa bigamije guteza imbere impano z’abana n’urubyiruko.
Ikindi kintu cyihariye kuri Jimara Hope Court ni imiterere yacyo yahumetswe n’igiti cya Baobab, kizwi cyane muri Gambia no mu bindi bihugu bya Afurika.
Muri uwo muco, igiti cya Baobab gifatwa nk’ikimenyetso cy’imbaraga, ubwenge, ubumwe n’ubusabane. Ni n’ahantu abantu bakunze guhurira bakaganira, bagasangira inkuru ndetse bakungurana ibitekerezo ku bibazo bibareba.
Ni muri urwo rwego igishushanyo mbonera cy’iki kibuga cyatekerejweho hagamijwe kugaragaza uruhare rwacyo mu guhuza abaturage no kubaka umuryango urangwa n’ubufatanye.
Nk’uko igiti cya Baobab kiba ari ahantu abantu bahurira, iki kibuga na cyo kizaba umwanya w’urubyiruko n’abagore wo guhurira hamwe, gusangira ubumenyi no gushakira hamwe ibisubizo by’ibibazo bibugarije.
Giants of Africa ni umuryango washinzwe na Masai Ujiri, usanzwe uzwi mu ruhando rwa Basketball ku rwego mpuzamahanga, aho yagiye agira uruhare mu guteza imbere uyu mukino no guha urubyiruko rwo muri Afurika amahirwe yo kuwukina.
Uyu muryango watangije gahunda ya Built Within muri Nzeri 2021, ufite intego yo kubaka ibibuga 100 bya Basketball mu bihugu bitandukanye bya Afurika.
Muri Gicurasi 2026, uyu muryango wari ugeze ku kibuga cya 50, nyuma yo gufungura ikindi muri Lagos muri Nigeria. Gufungura icya 54 muri Gambia ni indi ntambwe mu rugendo rwo kugera ku ntego yo kubaka ibibuga 100.
Umuryango uvuga ko kugeza ubu ibikorwa byawo byageze mu bihugu 23 byo muri Afurika, binyuze mu kubaka ibibuga, gutegura amarushanwa n’amahugurwa ya Basketball, ndetse n’ibindi bikorwa bigamije guteza imbere urubyiruko.
Mu rwego rwo kurushaho kwagura ibikorwa byawo, Giants of Africa yatangije gahunda yiswe Dribble for Peace, igamije gukoresha Basketball nk’uburyo bwo guhuza abaturage no guha urubyiruko amahirwe mu bice byugarijwe n’amakimbirane, umutekano muke n’ibibazo by’ibidukikije.
Iyi gahunda yagutse mu bihugu birimo Burkina Faso, Nigeria na Sénégal, ndetse ikaba yarashyizwe no mu bindi bihugu birimo Chad, Guinea, Mali, Mauritania, Niger na Sudani y’Epfo. Gambia na yo yinjiye muri uru rwego rw’ibikorwa binyuze mu mushinga wa Jimara.
Gufungura ikibuga cya 54 muri Gambia ni igikorwa gifite akamaro ku iterambere rya Basketball muri iki gihugu, ariko kandi kikaba n’urugero rw’uburyo siporo ishobora gukoreshwa mu guteza imbere ubumwe, uburezi, amahirwe y’akazi no guhindura imibereho y’abaturage.
