ETEFOP TSS Ruhengeri ni ishuri ryigenga ry’ubumenyingiro rya Diyosezi Gatolika ya Ruhengeri ryatangiye mu mwaka wa 2009, ritangizwa ku mugaragaro kuwa 03 Kamena 2009 na Nyiricyubagiro Musenyeri Vincent Harolimana, Umwepiskopi wa Diyosezi ya Ruhengeri.
Iri shuri ryatangiranye abanyeshuri 22, riragizwa Mutagatifu Karoli Lwanga. Icyo gihe ryari rifite intego yo guteza imbere ubumenyingiro no gutegura icyerekezo cy’iterambere ryaryo mu gihe kizaza.
Kugeza ubu, iri shuri rifite amashami icyenda arimo; Ubuhanzi bw’imideri (Fashion Design), Ububaji (Wood Technology), Ubukanishi bw’ibinyabiziga (Automobile Technology), Ubwubatsi (Building Construction), Gukora mu nganda (Manufacturing Technology), Guteka no gutanga serivisi mu mahoteli (Food and Beverage Operation), Ikoranabuhanga (Networking and Internet Technology), Itumanaho rigezweho (Electronics and Telecommunication), ndetse no gutunganya ubwiza (Hair Dressing and Beauty).
Padiri Remedi Didier Dushyirehamwe, Umuyobozi wa ETEFOP TSS Ruhengeri, mu kwizihiza umunsi mukuru w’ishuri ryaragijwe Mutagatifu Karoli Lwanga kuwa 23 Gicurasi 2026, yavuze ko rimaze gutera intambwe igaragara ugereranyije n’aho ryatangiriye, ndetse rikaba rinakomeje kwakira abanyamahanga baza kurihahamo ubumenyi.
Yagize ati ‘’Dufite abanyamahanga baza guhaha ubumenyi muri iki gicumbi cy’ubumenyingiro kandi bagatahana impamba yuzuye. Ndavuga nk’abana turera hano baturuka muri RDC, u Burundi, Tanzaniya ndetse na Uganda.’’
Yakomeje avuga ko umusaruro w’iri shuri ukomeje kugaragara, cyane cyane mu mitsindire y’abanyeshuri igera ju 100%.
Ati ‘’Dufite umwana umwe watsinze neza agira amanota 91%, abandi benshi bari hagati y’amanota 70 na 80 harimo abana 62, hagati ya 60 na 70 harimo abana 49, hagati ya 50 na 60 harimo abana 19. Bose hamwe bakaba bari 172.’’
ETEFOP TSS Ruhengeri ifite ibyumba by’amashuri 23, ubwiherero 24 bw’abakobwa n’ubw’abahungu 24, amacumbi y’abakobwa n’ay’abahungu (Dormitories), aho abanyeshuri bafatira amafunguro (Dining Room), icyumba cy’imyidagaduro, icyumba cy’umukobwa ndetse n’ububiko (Stock).
Mu mwaka w’amashuri wa 2025–2026, iri shuri ryatangiranye abanyeshuri 947 biga amasomo asanzwe y’icyiciro cy’imyaka itatu n’abandi 163 biga amasomo y’igihe gito. Muri rusange, ubu rirera abanyeshuri 1,148 bafashwa n’abakozi 82, harimo n’abakozi b’ingoboka.
DORE AMWE MU MAFOTO YARANZE UYU MUHANGO, GUSA IRI SURI RYEREKANYE KO RIKORA BYINSHI BYIZA CYANE BITUMA UMWANA UHIZE WESE AHAVA ARI INTYOZA:
