Perezida wa Repubulika, Paul Kagame, yakiriye muri Village Urugwiro itsinda ry’abanyamuryango 19 b’Umuryango Mpuzamahanga uhuza abayobozi b’ibigo n’abashoramari rya Young Presidents’ Organization.
Ni amakuru yatangajwe n’ibiro bya Perezida Kagame ku rubuga rwa X, kuri uyu wa Kabiri, tariki ya 9 Kamena 2026.
Iri tsinda riyobowe na Rogelio Romero, uhagarariye ishami rya YPO Gold Panama, akaba n’Umuyobozi Mukuru wa sosiyete Concretex Panama.
YPO ni umuryango mpuzamahanga uhuza abayobozi b’ibigo n’abacuruzi bakomeye barenga 38,000 bo mu bihugu bisaga 130 ku Isi.
Ishami ryawo ryo muri Panama rigizwe n’abayobozi b’amasosiyete akomeye ndetse n’abashoramari bafite ibikorwa bikomeye mu nzego zitandukanye z’ubukungu bw’icyo gihugu.
Mu biganiro bagiranye na Perezida Kagame, hibanzwe ku rugendo rw’iterambere n’impinduka u Rwanda rumaze kugeraho, uburyo igihugu gikomeje guteza imbere rwiyemezamirimo no gushyigikira udushya mu bucuruzi, ndetse n’amahirwe ari mu bufatanye bw’ubukungu n’ishoramari hagati y’u Rwanda na Panama.
Ibi biganiro byagaragaje ubushake bw’impande zombi bwo kurushaho guteza imbere umubano ushingiye ku bucuruzi, ishoramari no guhanahana ubunararibonye mu nzego zitandukanye z’iterambere ry’ubukungu.
