Mu gitondo cyo kuri uyu wa kabiri nibwo inkuru yabaye kimomo ko hari abayobozi 14 bo mu karere ka Nyabihu batawe muri yombi, aho bakekwaho kunyereza amafaranga yagenewe kubaka inzu z’abarokotse Jenoside yakorewe Abatutsi mu 1994.
Abakekwa barimo Mugiraneza David umunyamabanga nshingwabikorwa w’akarere ka Nyabihu, Ishimwe Samuel Perezida wa Ibuka ndetse n’abandi bakozi b’Akarere, umukozi w’akarere ushinzwe ibikoresho (Logistique), Umuyobozi ushinzwe imibereho myiza, ushinzwe inyubako mu ishami ry’ubutaka, n’abashinzwe amasoko.
Guverineri w’intara w’Iburengerazuba Ntibitura Jean Bosco mu butumwa yahaye ikinyamakuru (Greatlakesharald) dukesha iyi nkuru, yagize ati”Aya makuru twayamenye ko hari abayobozi 14 bafashwe n’urwego rw’ubugenzacyaha, amakuru akavuga ko bari kubazwa inshingano zijyanye no gusana inzu 17 y’abarokotse Jenocide yakorewe Abatutsi muri 1994, bikekwa ko hari ibitarakozwe neza mu mirenge 7 y’akarere ka Nyabihu”
Guverineri yakomeje agira ati”nta cyuho gihari kuko birasanzwe ko amategeko ateganya uko serivice zitangwa iyo umukozi uhasanzwe agise impamvu ituma aba adahari mu gihe runaka ku mpamvu iyo ariyo yose. Naho rero biraza gukorwa, ubutumwa natanga ni uko buri mukozi akwiye kuba akora inshingano ze uko bikwiye, birinda gukora ibyaba binyuranye n’akazi bagomba gukora mu mitangire ya serivisi, ku baturage, nta serivisi n’imwe bazabura.”
