Ku gicamunsi cyo kuwa 22 Kanama 2026 nibwo hafunguwe kumugaragaro Imurikagurisha ry’Intara y’Amajyaruguru 2026, riri kubera mu Karere ka Musanze ahazwi ku izina rya ‘Stade Ubworoherane’.
UWANYIRIGIRA Clararisse visi Meya ushinzwe ubukungu mu Karere ka Musanze yashimiye abashoramari baritabiriye Expo yateguwe n’Intara y’Amajyaruguru kubufatanye na PSF babashije gutegura iki gikorwa cyiza cyo kumurika ibicuruzwa bitandukanye mu Karere ayoboramo.
Abashoramari batandukanye basobanuye byinshi kubicuruzwa baje kumurika
Yakomoje ko bakomeje gushishikariza abashoramari gukomeza kuza kumurika ibikorwa byabo bakira abakiriya neza ndetse bagahanga udushya mu gutanga serivise zabo zitandukanye.
Abitabiriye batandukanye harimo abazanye iby’ubworozi, Ubwubatsi n’ibindi bigo by’amashuri na kaminuza zitandukanye bikorera mu Ntara y’Amajyaruguru.
Muri iki gikorwa cyo gufungura kumugaragaro Expo yateguwe n’Intara y’Amajyaruguru kubufatanye na PSF itorero urukerereza rikorera ibikorwa byaryo mu Ntara y’Amajyaruguru naryo ryahawe umwanya kugira ngo risusurutse abashyitsi bari baje kurifungura kumugaragaro ribasha kwerekana imbyino zitandukanye.
Umuyobozi wa PSF mu Ntara y’Amajyaruguru Bwana TUGENGWANAYO Theonase yagize ati:” Mu izina rya PSF mfashe uyu mwanya nshimira urwego rw’abikorera, nshimira kandi mwese mwabashije kwitabira cyane cyane abikorera bitabiriye bagera ku 145 harimo abanyamahanga 6. Iyi Expo Ni ibikorwa ngarukamwaka dukora kugira ngo tubashe kwigira ku bandi ibyo bakora kugira ngo tubashe gukuramo amafaranga”.
Turasabwa kurangwa n’udushya, Made in Rwanda, Gukorera hamwe. Kandi tunashishikariza irimurikagurisha ari nako dusaba abaturage kwitinda inzoga zitujuje ubuziranenge kubera ko zangiza ubuzima bw’umuturage wese uzinywaho.
Yasoje asaba Guverineri w’Intara y’Amajyaruguru Bwana MUGABOWAGAHUNDE MAURICE avuga ko Expo yazajya ihabwa umwanya uhagije dore ko nkubu hari ikibuga cy’umupira kibangamira abaza kumurika ibikorwa byabo. Akomeza asaba ko bazahabwa ahakorera Expo abashoramari ntibajye bubaka ngo bongere gusenya ahubwo bikazajya bihoraho Aho yavugaga inyubako zazubakwa ahakorerwa imurikagutisha zihoraho.
Aha abashoramari batandukanye bakorera babanza kuhubaka imirikabikorwa ryasozwa bakongera gusenya
Intumwa ya PSF mu Rwanda yagize ati:” Mu izina rya chairman wa PSF nejejwe no kuba nifatanyije n’ubuyobozi bw’Intara y’Amajyaruguru ndetse n’abandi bayobozi batandukanye bayobora uturere twose tw’Intara bazwi ku izina rya Meya ndetse n’abashoramari baryitabiriye uyu munsi ko ari igikorwa gifite igisobanuro gikomeye. Iyi Expo n’ikimenyetso cy’ubufatanye n’abikorera ndetse Ni urubuga rutuma tumenya ibyo tumaze kugeraho kugira ngo tubafashe kumenyekanisha ibyo bakora bikagera no mu mahanga.
Yabashije kumenyesha ko iyi Expo irimo kubera mu turere tw’igihugu dutandukanye dore nkubu no mu Karere ka Kayonza naho irimo kuba ikazakomereza mu Karere ka Rubavu mu kwezi kw’ukuboza.
Yanakomoje avuga ko bateganya kuzakira abanyamahanga basaga ibihumbi bitatu (3000) bazaturuka muri EAC.
Yasoje avuga ko bazateza imbee abikorera no kubafungurira amasoko bakagera kure yaho bakorera.
Umuyobozi w’Intara y’Amajyaruguru Bwana MUGABOWAGAHUNDE Maurice yabashije gushimira abitabiriye batandukanye ndetse n’abandi baje kwerekana iby’ubuhinzi n’abakora ibitanga amashanyarazi ababwira ko bakoze igikorwa cyiza cyindashyikirwa bakaza kumurika ibicuruzwa byabo batandukanye.
Guverineri MUGABOWAGAHUNDE MAURICE yasuye abashoramari batandukanye aho barimo gukorera
Yagize ati:” Imurikagurisha si aho kwerekana ibyo abashoramari bazanye gusa cyangwa se bakora ahubwo ni uburyo bwo kubanza ni ukumenya uko ishoramari rikorwa. Mwese mwikorera ndabasaba gukorera kumahitamo ya leta mwirinda gucuruza ibicuruzwa bitujuje ubuziranenge, Namwe bahinzi borozi ndabasaba kongera umusaruro ndetse namwe mufite inganda ndabasaba kongera ubumenyi ndetse namwe rubyiruko ndabasaba kugira ngo mubashe kumenyana n’abashoramari kugira ngo babahe akazi no kugira umuco wo guhanga udushya duhoraho.
Ndashimira kandi byumwihariko abamurikabikorwa bose bitabiriye, anabizeza ko bazatahana agatubutse kubera ko Intara y’Amajyaruguru bazakomeza guteza imbere abikorera.
Muri uyu mwaka yasabye buri wese witabiriye gukomeza kwiga udushya mu buryo bwo kwiga uko yabasha kwiteza imbere.
Yasoje ashishikariza abanya – Musanze kuzitabira igitaramo kizaba tariki ya 03/09/2026 kizabera muri Stade Ubworoherane bikabaza bishyushye bitewe n’abahanzi bafite amazina akomeye mu Rwanda.
Yanakomoje abwira abaturage by’umwihariko batuye mu Ntara y’Amajyaruguru ko abasabye kuvana amaboko mu mufuka bagakora birinda ubunebwe, Ubuzererezi cyane cyane banirinda kunywa inzoga zitujuje ubuziranenge zizwi ku izina ry’ibyuma.
Uyu muhango wo gufungura kumugaragaro Imurikagurisha ryitabiriwe n’abayobozi batandukanye
Abayobozi batandukanye n’abashoramari ubwo bayifunguraga kumugaragaro muri Stade Ubworoherane
Abashoramari batandukanye bazanye ibicuruzwa bigezweho
Abashoramari bazanye udushya twinshi muri iyi Expo yateguwe n’Intara y’Amajyaruguru kubufatanye na PSF
Abanyamahanga baje kumurika ibicuruzwa byabo bageze kuri batandatu
