Ikipe y’Igihugu y’u Rwanda, Amavubi, yageze amahoro i Bamako muri Mali ku wa Kabiri, tariki ya 10 Ugushyingo 2026, aho igiye gukina n’Ikipe y’Igihugu ya Mali mu mukino wa gatatu wo mu Itsinda K ry’amajonjora y’Igikombe cya Afurika cy’Ibihugu (CAN) cya 2027.
Ishyirahamwe ry’Umupira w’Amaguru mu Rwanda (FERWAFA) ryemeje aya makuru ku mugoroba wo kuri uwo wa Kabiri, ribinyujije ku rubuga rwa Instagram, aho ryatangaje ko Amavubi yageze muri Mali amahoro, yiteguye gushyira imbaraga mu mukino ukomeye uyategereje.
Mu mashusho FERWAFA yashyize hanze, hagaragaramo indege ya RwandAir igwa ku Kibuga Mpuzamahanga cy’Indege cya Bamako, mbere y’uko abakinnyi n’abagize itsinda ry’abatoza basohoka mu ndege.
Ayo mashusho akomeza agaragaza abakinnyi berekeza muri bisi yari yabategereje ku kibuga cy’indege, yanditseho ijambo “RWANDA”, igomba kubageza aho bari bucumbikwe.
Mu rugendo rwabagejeje kuri hoteli bazacumbikamo, iyo bisi yaherekejwe n’abapolisi bari kuri moto, banyura mu mihanda yo mu Mujyi wa Bamako, mbere y’uko abakinnyi bagera aho bagomba kuruhukira no kwitegurira umukino.
Amavubi yageze muri Mali ari kumwe n’Umutoza Mukuru, Stephen Constantine, wajyanye n’abakinnyi 24 bazifashishwa muri uyu mukino uteganyijwe ku wa Gatanu, tariki ya 13 Ugushyingo 2026, kuri Stade du 26 Mars i Bamako, saa tatu z’ijoro (21:00) ku isaha y’i Kigali.
Uyu mukino uzahuza amakipe abiri ayoboye Itsinda K, kuko u Rwanda na Mali buri imwe ifite amanota atandatu mu mikino ibiri imaze gukina.
Amavubi yatsinze Liberia ibitego 3-1 i Kigali, anatsinda Cap-Vert ibitego 2-1 mu mukino wabereye iwayo. Mali yo yatsinze Cap-Vert ibitego 3-1 na Liberia igitego 1-0.
U Rwanda ni rwo ruyoboye iri tsinda mbere y’uko amakipe yombi ahura i Bamako.
Nyuma y’uyu mukino, Amavubi na Mali azongera guhura ku wa Kabiri, tariki ya 17 Ugushyingo 2026, kuri Stade Amahoro i Kigali, mu mukino wo kwishyura.
