Umunyakameruni wamenyekanye cyane muri UFC, ubu akaba ari n’Umuyobozi Mukuru wa Professional Fighters League (PFL) Africa, Francis Ngannou, ategerejwe i Kigali aho azitabiraimikino rya mbere rya PFL Africa semifinals.
Iri serukiramuco rya mbere ry’amateka mu mikino ya Mixed Martial Arts (MMA) rizaba ku wa Gatandatu, tariki ya 18 Ukwakira 2025, ribere muri BK Arena.
Ni ku nshuro ya mbere u Rwanda rugiye kwakira imikino ya playoffs ya PFL Africa, bikaba ari intambwe ikomeye mu gufata uyu mugabane nk’uwinjira mu ruhando mpuzamahanga rw’iyi mikino ikomeje gukundwa cyane ku isi.
Francis Ngannou, umunya-Kameruni ufite ubwenegihugu bw’u Bufaransa, uzwi ku rwego mpuzamahanga kubera imbaraga zidasanzwe mu mikino yo kurwana (combat sports), akomeje guhindura amateka ye y’umwuga mu nzira nshya igamije guteza imbere no guha abandi ubushobozi.
Nyuma yo kwegukana igikombe cya PFL Super Fights Heavyweight mu buryo budasanzwe aho yatsinze knockout mu gace ka mbere mu mwaka ushize Ngannou yahise ahindura intego ze, atangira gushyira imbaraga cyane mu mirimo ye mishya yo mu rwego rwo hejuru nk’umuyobozi.
Uyu mukinnyi wamamaye nka “The Predator” ubu ni Umuyobozi Mukuru wa PFL Africa, aho akomeje guharanira ko iyi mikino yakwigarurira Afurika yose, igafasha urubyiruko kubona amahirwe mashya mu rugendo rw’imikino ya MMA.
Uruhare rwe rufatwa nk’urwego rushya mu rugamba rwo gufasha abakinnyi bo muri Afurika kubona amahirwe yo guhura n’abandi bakinnyi mpuzamahanga, atari mu kwerekana imbaraga gusa, ahubwo no mu gushyira imbere iterambere ry’umugabane binyuze mu mikino.
Amasezerano y’ingenzi Francis Ngannou yagiranye na Professional Fighters League (PFL) ntiyagarukiye gusa ku rwego rwo gukina. Yaje no kumushyira mu mwanya w’ingenzi: kuba Umuyobozi Mukuru (Chairman) wa PFL Africa ndetse no kugira uburenganzira nk’umwe mu banyamigabane bayo.
Uruhare rwe muri PFL Africa rufite isano ikomeye n’urugendo rwe rw’ubuzima: kuva mu kazi katoroshye ko gukura umusenyi mu birombe byo muri Kameruni, kugeza mu buzima bwo kubura aho aba i Paris, hanyuma agahinduka umwe mu banyabigwi ku isi mu mikino ya MMA.
Iyi nkuru ye bwite niyo imutera ishyaka ryo gufasha abandi Banyafurika, cyane cyane abashaka kugera ku rwego rw’isi binyuze mu mikino.
Ngannou yakunze kugaragaza ko PFL Africa yatekerejwe nk’urubuga mpuzamahanga rugamije gufasha abakinnyi b’Abanyafurika kugira ubuzima bwa kinyamwuga batabanje kwimukira hanze y’umugabane.
Ati: “Abakinnyi bacu bakwiye kubona amahirwe yo kubaka ubuzima bwa kinyamwuga hano iwacu, kandi isi yose ikabibona.”
Izi semifinals zizabera i Kigali ku wa 18 Ukwakira 2025 muri BK Arena zifatwa nk’intambwe ikomeye mu gushyira mu bikorwa iki cyerekezo.
Ni umwanya wo kwerekana impano zituruka hirya no hino muri Afurika, harimo n’abakinnyi bafashijwe n’umuryango wa Ngannou Foundation.
Ibi bizerekana ko u Rwanda rutangiye gufata umwanya ukomeye mu kwakira ibikorwa bikomeye by’imyidagaduro n’imikino ya gisirimu, bikanagaragaza uburyo Afurika ifite ubushobozi bwo gutoza no guha amahirwe urubyiruko rwayo.
