Ihuriro ry’imiryango iharanira uburenganzira bwa muntu muri Repubulika Iharanira Demokarasi ya Kongo ryagaragaje impungenge zikomeye ku mutekano w’Abanyamulenge batuye mu misozi miremire ya Kivu y’Amajyepfo, rikaburira ko hakomeje ibikorwa bishobora gutuma habaho ibyaha bikomeye byibasira abasivili.
Mu ibaruwa yandikiwe Umunyamabanga Mukuru w’Umuryango w’Abibumbye, António Guterres, ndetse na Minisitiri w’Ububanyi n’Amahanga wa Leta Zunze Ubumwe za Amerika, Marco Rubio, tariki ya 23 Mata 2026, iri huriro ryatangaje ko ibitero bikomeje kwibasira abaturage kuva mu 2025.
Iyi baruwa yashyizweho umukono na Pitchou Roland Shomongo Mbey na Me Jean-Paul Paluku Ngahangondi, bayoboye Ihuriro Mpuzamahanga riharanira Uburenganzira bwa Muntu muri Kongo (CIDHC), igaragaza ko mu mezi ashize hakoreshejwe drones z’intambara n’indege za gisirikare mu bitero byibasira imidugudu, amasoko, amashuri n’insengero.
Bavuga ko mu bice bya Hauts et Moyennes Plateaux, imirwano n’ibitero byiyongereye ku buryo byatumye abantu barenga 25,000 bava mu byabo mu gihe gito.
Mu byabaye biheruka, ku wa 22 Mata 2026, drone yateye ibisasu bine ku kigo cya kaminuza ya Eben-Ezer i Minembwe, yangiza inyubako z’ubuyobozi. Ibi byabanje no kuba ku wa 10 Mata, ubwo ibisasu by’indege z’intambara byangizaga ikibuga cy’indege cya Minembwe ku nshuro ya gatatu mu gihe kitarenze umwaka.
Ibaruwa igaragaza kandi ibindi bitero byabaye kuva muri Gashyantare na Werurwe, byahitanye abasivili barimo abana n’abasaza, binasenya imitungo n’insengero, bituma ibihumbi by’abaturage bava mu byabo.
Aba baharanira uburenganzira bwa muntu bavuga ko nubwo hari amasezerano yo guhagarika imirwano yasinyiwe i Doha, akomeje kurengwaho, hakaba hakomeje kugaragara ibitero byifashishije drones n’indege za gisirikare.
Bashimangira ko Abanyamulenge bamaze igihe kirekire bahura n’akaga n’ivangura, bakaburira ko hakenewe ingamba zihuse mpuzamahanga kugira ngo hirindwe ko habaho ibyaha bikomeye byibasira inyokomuntu.
Basaba Umuryango w’Abibumbye na Leta Zunze Ubumwe za Amerika kohereza itsinda ryigenga rigenzura ibibera muri ako gace, gufungura iperereza ryimbitse, no gusuzuma ubufatanye bwa gisirikare n’imitwe ishinjwa ibi bikorwa.
Kugeza ubu, ubutegetsi bwa Kongo n’ingabo za FARDC ntacyo biratangaza ku byo bishinjwa.
