Umunyabigwi mu mupira w’amaguru, Lionel Messi, yakinnye umukino we wa mu Ikipe y’Igihugu ya Argentine batsinda Bénin ibitego 3-0 mu mukino wa gicuti.
Uyu mukino w’amarangamutima menshi wabereye kuri Sitadebyitwa ‘Estadio Monumental’ muri Argentine yari yuzuye abafana ibihumbi 80 mu rukerera rwo kuri uyu wa Gatatu, tariki ya 7 Ukwakira 2026.
Amatike yo kwitabira uyu mukino muri iyi sitade, yari yarashize ku isoko mu isaha imwe ubwo yashyirwaga hanze tariki 25 Nzeri 2026.
Muri uyu mukino, Bénin yihagazeho imbere ya Argentine banganya 0-0 mu gice cya mbere. Ni iminota 45 yaranzwe no gusatira cyane ku ruhande rwa Messi na bagenzi be ariko ab’inyuma ndetse n’umuzamu wa Bénin Marcel Dandjinou bugarira neza.
Argentine yatangiranye imbaraga nyinshi bidatsinze ku munota wa 48 yafunguye amazamu ku gitego cyatsinzwe na Nicolás Otamendi na na Nico Paz atsinda igitego cya kabiri ku munota wa 62.
Imipira yombi yavuyemo ibitego yatanzwe na Lionel Messi. Uyu rutahizamu yahise yuzuza imipira 69 ivamo ibitego mu Ikipe ya Argentine.
Ku munota wa 70’ Argentine yabonye Penaliti nyuma y’ikosa abasore ba Bénin bakoreye myugariro Agustín Giay ari mu rubuga rw’amahina.
Iyi Penaliti yinjijwe neza Messi atsindira Argentine igitego cya gatatu ku munota wa 71 ndetse kiba icya nyuma ayitsindiye La Albiceleste mu mateka.
Ntakindi gitego cyabonetse kugeza umukino urangiye Argentine itsinze Bénin ibitego 3-0 mu mukino wa gicuti wari ugamije gusezerera mu cyubahiro umunyabigwi mu mupira w’amaguru, Lionel Messi.
Mu myaka 21 ishize yakiniye Igihugu cye imikino 208, ayitsindira ibitego 126 anatanga imipira 70 yavuyemo ibitego.
Ari kumwe na Argentine yatangiye gukinira mu 2005, yegukanye Igikombe cy’Isi cy’Abatarengeje imyaka 20 mu 2005, Umudali wa Zahabu mu Mikino Olempike ya 2008, Copa América inshuro ebyiri mu 2021 na 2024, Igikombe cy’Isi cya 2022 na Finalissima mu 2022.
Afite andi mateka mu makipe yanyuzemo yamufashije gutwara Ballon d’Or umunani, ari na we wegukanye nyinshi mu mateka ya ruhago n’ibindi bitandukanye, akesha amakipe yakiniye arimo FC Barcelone, Paris Saint-Germain na Inter Miami ari gukinira muri Leta Zunze Ubumwe za Amerika.
