Dr Kizza Besigye, umunyapolitiki utavuga rumwe n’ubutegetsi uri muri gereza, hamwe n’uwo bareganwa Hajji Obeid Lutale, bongeye gutanga ikirego mu Rukiko Rukuru basaba ko urubanza rw’inshinjabyaha baregwamo ruhagarikwa, bavuga ko habayeho ihohoterwa rikomeye ry’uburenganzira bwabo buteganywa n’Itegeko Nshinga.
Aba bagabo bombi baregwa icyaha cyo kugambanira igihugu ndetse no kudatanga amakuru ku mugambi wo kugambanira igihugu. Bavuga ko uburyo bafashwemo, bafungiwemo ndetse bakurikiranwemo n’ubutabera bwabangamiye uburenganzira bwabo bwo kuburanishwa mu buryo buboneye nk’uko Itegeko Nshinga ribiteganya.
Nk’uko babivuga, ikurikiranacyaha ryabo ryaranzwe n’ibyo bise gushimutwa mu buryo bunyuranyije n’amategeko, gukorerwa iyicarubozo, gufungwa igihe kirekire ndetse n’amagambo bavuga ko yatangajwe ku mugaragaro n’Umugaba Mukuru w’Ingabo za Uganda (CDF), Gen. Muhoozi Kainerugaba, agamije kubacira urubanza mbere y’igihe.
Basaba ko byemezwa n’urukiko ko gushimutwa kwabo bivugwa ko kwabereye i Nairobi muri Kenya ku wa 16 Ugushyingo 2024, bikozwe n’abasirikare ba Uganda, byari binyuranyije n’amategeko, kandi ko bituma urubanza rwakurikiyeho rutagira ishingiro mu mategeko.
Inyandiko zashyikirijwe urukiko zigaragaza ubutumwa butandukanye bivugwa ko bwatangajwe ku rubuga nkoranyambaga X, harimo ubwatangajwe ku wa 16 Mutarama 2025 bugira buti: “Tuzamanika KB ku Munsi w’Intwari. Uwo ni wo munsi mwiza wo gupfiraho.”
Abaregera urukiko bavuga ko ayo magambo agaragaza kubacira urubanza mbere y’uko ruburanishwa, kubakangisha ibihano bitanyuze mu mategeko, kubakorera iyicarubozo ryo mu mutwe ndetse no kwivanga mu bwigenge bw’ubucamanza.
