DJ Sonia, umwe mu banyamakuru akaba n’umuvangamuziki bazwi mu Rwanda, yatangaje ko yahisemo gutanga imbabazi ku bantu bari bakurikiranywe n’inzego z’ubutabera bazira kumuhohotera no kumutuka bifashishije imbuga nkoranyambaga.
Mu butumwa yanyujije ku mbuga nkoranyambaga, DJ Sonia yavuze ko yafashe iki cyemezo nyuma yo gutekereza ku ngaruka amakimbirane nk’aya ashobora kugira ku buzima bw’ababigizemo uruhare n’imiryango yabo. Yavuze ko nubwo yababajwe n’ibyo yakorewe, umutima we wamubwiye ko kubabarira ari byo bikwiye.
Yagize ati: “Narabababariye. Icyo nifuzaga ni uko buri wese amenya ko amagambo avugirwa cyangwa yandikwa ku mbuga nkoranyambaga ashobora gusenya ubuzima bw’undi. Twese dukwiye kubahana no gukoresha neza aya mahirwe yo gutanga ibitekerezo.”
Aya magambo yahise akwirakwira ku mbuga nkoranyambaga, aho bamwe bashimye icyemezo cye bavuga ko kigaragaza umutima wo kubabarira no kwimakaza ubwiyunge, mu gihe abandi basabye ko abantu bakomeza kwigishwa amategeko n’ingaruka zo gukoresha nabi imbuga nkoranyambaga.
Abakurikirana iby’ikoranabuhanga n’itangazamakuru bavuga ko uru rubanza rwabaye isomo rikomeye ku bakoresha imbuga nkoranyambaga, cyane cyane ku birebana no kwirinda gutukana, gusebanya no guhohotera abandi bifashishije internet.
Nubwo DJ Sonia yahisemo gutanga imbabazi, yibukije ko ihohoterwa rikorerwa ku mbuga nkoranyambaga rikomeje kuba ikibazo gikomeye, asaba buri wese gukoresha amagambo yubaka no kubaha uburenganzira bw’abandi.
Iki cyemezo gishobora gufungura ipaji nshya hagati ye n’abari bamukoreye ihohoterwa, ariko kikaba n’ubutumwa bukomeye bwo kwerekana ko imbabazi n’ubwiyunge bishobora kuba inzira nziza yo gukemura amakimbirane, mu gihe amategeko akomeza gukora inshingano zayo zo kurinda uburenganzira bwa buri wese.Mu bari batawe batawe muri yombi n’Rwego rw’Igihugu rw’Ubugenzacyaha (RIB ) Dj Sonia yahaye imbabazi harimo Pizzo Cassien nyiri Max Tv na Kazungu Kaboss uzwi ku mbuga nkoranyambaga .
