Leta ya Repubulika Iharanira Demokarasi ya Congo n’umutwe w’inyeshyamba za M23 bageze ku masezerano akomeye agamije koroshya itangwa ry’imfashanyo no kurinda abasivili, mu biganiro by’amahoro byabereye i Montreux mu Switzerland.
Aya masezerano agaragaza intambwe y’ingenzi yagezweho muri uru rugendo rwa cyenda rw’ibiganiro hagati ya leta n’inyeshyamba.
Kimwe mu by’ingenzi byemeranyijweho ni uko impande zombi zizarekura imfungwa zigera kuri 477. Muri zo, abantu 311 bafungiye ku ruhande rw’ihuriro ry’inyeshyamba rya Alliance Fleuve Congo ririmo na M23, naho 166 bari bafungiye ku ruhande rwa leta ya Congo.
Ibi byitezweho guteza imbere icyizere hagati y’impande ziri mu biganiro no gufasha mu kubaka inzira iganisha ku mahoro arambye.
Impande zombi zemeranyije kandi koroshya urujya n’uruza rw’imodoka zitwara imfashanyo no kwirinda ibitero ku basivili, mu rwego rwo kugabanya ingaruka z’intambara ku baturage bo mu burasirazuba bwa Congo.
Amakuru yatanzwe na Minisiteri y’Ububanyi n’amahanga y’Amerika agaragaza ko hari intambwe imaze guterwa mu bijyanye n’amasezerano arebana no gufasha abaturage, kurinda uburenganzira bwabo no kugenzura iyubahirizwa ry’agahenge.
Biteganyijwe ko, ku bufatanye na MONUSCO, hazatangira ibikorwa byo kugenzura uko ayo masezerano ashyirwa mu bikorwa mu gihe cy’icyumweru kimwe kiri imbere.
Ibi bizafasha kugenzura imirongo y’imirwano no kureba niba impande zombi zubahiriza ibyo ziyemeje.
Aya masezerano afite intego yo guhagarika imirwano no kugarura ituze mu burasirazuba bwa RDC, hubahirizwa ibyo impande zombi zari zarumvikanyeho mbere mu biganiro byabereye i Doha, bijyanye no guhagarika imirwano.
Abaturage bo mu bice byibasiwe n’imirwano bagaragaje ko aya masezerano ashobora kubafasha kubona ubufasha bwari bwaratinze kubageraho.
Imiryango mpuzamahanga ikora ibikorwa by’ubutabazi yavuze ko iyi ari intambwe nziza iganisha ku gufasha abaturage, nubwo hakenewe gukomeza kugenzura ishyirwa mu bikorwa ry’ayo masezerano kugira ngo yubahirizwe.
Nubwo hakiri urugendo rurerure, abasesenguzi bavuga ko iyi ari intambwe nziza ishobora gufasha mu kugarura amahoro mu karere kamaze igihe kinini karazahajwe n’intambara.
