Amabwiriza agenga umuhango wo gusezerana mu nsengero utagomba kurenza isaha

Minisiteri y’Ubutegetsi bw’Igihugu yatangaje amabwiriza mashya agenga umuhango wo gusezerana mu nsengero hubahirizwa ingamba zo kwirinda ikwirakwira rya Coronavirus arimo ko gahunda y’abazasezerana igomba kumenyeshwa inzego z’ibanze habura iminsi ibiri mu gihe igikorwa nyirizina kitagomba kurenza isaha imwe.

Ubwo Coronavirus cyari kimaze kugera mu Rwanda, mu ngamba Guverinoma yatangaje ku wa 14 Werurwe 2020, harimo gufunga amashuri n’insengero, bitangazwa ko “amahuriro y’abantu benshi nk’imikino ndetse n’ubukwe bibaye bisubitswe.”

Inama y’Abaminisitiri idasanzwe yateranye ku wa Kabiri tariki 16 Kamena 2020, yemeje ko ‘Imihango yo gushyingirwa mu nsengero iremewe ariko ikitabirwa n’abantu batarenze 30. Minisiteri y’Ubutegetsi bw’Igihugu izatanga amabwiriza arambuye kuri iyi ngingo’.

Itangazo ryashyizweho umukono na Minisitiri w’Ubutegetsi bw’Igihugu, Prof. Shyaka Anastase, kuri uyu wa Kane, tariki ya 18 Kamena 2020, ryerekana amabwiriza mashya azubahirizwa n’amadini n’amatorero mu gusezeranya abagiye kurushinga.

Mu ngingo z’ingenzi ziyakubiyemo harimo ko aho ubera hakwiye kuba hujuje ibyangombwa, hagasukurwa mbere na nyuma y’umuhango wo gusezeranya, hanashyizweho uburyo bwo kwirinda Coronavirus bworohereza abantu kubahiriza amabwiriza arimo gukaraba neza intoki no guhana intera.

Mu gukaza ubwirinzi, hanzuwe ko umuhango wo gusezerana udakwiye kurenza iminota 60 mu gihe ibirori byo kwakira abantu nabyo bitagomba gutumirwamo abarenze 30.

Iyubahirizwa ry’aya mabwiriza rizajya rikurikiranwa n’abafite inyubako zakira ibi birori, abayobozi b’inzego z’ibanze n’abigisha b’idini/itorero.

  Amabwiriza agomba kubahirizwa:

1. Imiryango ishingiye ku myemerere igomba kugeza mu nyandiko ingengabihe y’abazasezerana ku nzego z’ibanze (Umurenge) nibura iminsi ibiri mbere yuko umuhango uba.

2. Gusezerana imbere y’Imana bishobora gukorerwa mu nsengero zujuje ibisabwa, izindi nyubako zakira abantu (hotel, amahema, sale) n’ahandi hantu hafunguye.

3. Usezeranya agomba kuba ahagarariye umuryango ushingiye ku myemerere wemewe.

4. Insengero, inyubako n’ahandi hantu hasezeranirwa hagomba kuba hujuje ibi bikurikira:

a. Inyubako isengerwamo igomba kuba isanzwe yemerewe gusengerwamo hashingiwe ku mabwiriza agenga inyubako zisengerwamo.

b. Gusukura inyubako mbere na nyuma y’umuhango wo gusezeranya hakoreshejwe amazi meza n’isabune.

c. Gushyiraho uburyo bwo gukaraba intoki [kandagira ukarabe n’amazi meza n’isabune cyangwa imiti isukura intoki/hand sanitizer].

d. Kwambara agapfukamunwa neza ku bantu bose baje mu muhango wo gusezerana.

e. Gusiga nibura intera ya metero ebyiri hagati y’umuntu n’undi uretse hagati y’abasezerana.

5. Mu gikorwa cyo gusezeranya

a. Gusuhuzanya bahana amaboko no guhoberana cyangwa guhobera abageni birabujijwe keretse hagati y’abasezerana.

b. Guhererekanya indangururamajwi [microphone] n’ibindi bikoresho (urugero: Ibitabo by’indirimbo, Bibiliya, Korowani, ibyuma bya Muzika) ntibyemewe.

c. Gutanga amaturo bigomba gukorwa hifashishijwe ikoranabuhanga (mobile money services, money transfer,…)

d. Gusengera abantu barambikwaho ibiganza birabujijwe.

e. Kugira ngo duhamye ingamba zo kwirinda icyorezo cya Coronavirus turasaba ko igikorwa cyo gusezeranya nyirizina kitarenza isaha imwe.

6. Ibirori byo kwakira abatumiwe (reception)

a. Umubare w’abitabira uyu muhango ntugomba kurenga abantu 30 kandi hakubahirizwa amabwiriza yose yo kwirinda icyorezo cya Coronavirus.

b. Umuhango ugomba kubera ahantu habugenewe kandi hafunguye; mu gihe bikorewe muri hoteli nabwo abawitabiriye ntibagomba kurenga 30 kandi hakubahirizwa amabwiriza ajyanye no kwirinda Coronavirus.

7. Iyubahirizwa ry’amabwiriza

a. Abayobozi b’inzego z’ibanze n’izindi nzego bafatanyije mu kwirinda Coronavirus no gukumira ikwirakwira ryayo, bagomba gukurikirana ishyirwa mu bikorwa ry’aya mabwiriza.

b. Abafite inyubako zakira ibi birori, abayobozi n’abigisha b’idini/itorero ryabasezeranyije bagomba gukurikirana iyubahirizwa ry’aya mabwiriza.

447 total views, 1 views today

Facebook Comments
Share Button

auto ads

Recommended For You

About the Author: mc dammy emmanuel

Leave a Reply

Your email address will not be published. Required fields are marked *