Umutoza wa Rayon Sport Javier Martinez Espinoza yahagaritswe ku mirimo ye

Nyuma yo gutsindwa na APR Fc  ibitego 2-0 kuri uyu wa Gatandatu mu mukino w’umunsi wa 15 muri shampiyona y’u Rwanda, Uwari umutoza wa Rayon Sports Javier Martinez Espinoza ni we ubigendeyemo kuko yaraye asezerewe mu kazi ke yari amazemo amezi atari menshi

Nyuma y’inama ndende yaraye ihuje Komite nyobozi ya Rayon Sports, yafashe umwanzuro wo gusezerera umunya-Mexique Javier Martinez Espinoza wari umaze amezi atatu ayitoza. Ibi bikaba bije nyuma yo kutishimira uburyo uyu mutoza yitwaye mu mikino ibanza ya shampiyona, harimo by’umwihariko umukino yatsinzwemo na APR FC bigaragara ko anarushwa, aha akaba yarashinjwe na benshi ko yahagaritse nabi iyi kipe ya Rayon Sports mu kibuga ndetse ko hari n’abakinnyi atakinishije kandi bari gufasha iyi kipe.

Ikipe ya Rayon Sports ibinyujije ku rubuga rwayo rwa Twitter, yemeje ko yatandukanye n’uyu mutoza w’umunya Mexico wayigezemo kuwa 21 Nzeli 2019. Rayon Sports yagize ati “Rayon Sports yamaze gutandukana n’uwari umutoza wayo Javier Martinez Espinoza wari umaze amezi asaga atatu muri iyi kipe. Twumvikanye n’uyu munya Mexico gusesa amasezerano nk’umutoza mukuru. Byinshi birakurikiraho”.

Amakuru atugeraho avuga ko uyu mutoza hari uburyo atahuzaga n’abatoza bungirije, kubera ko yagiriwe inama kenshi ku mipangire y’ikipe ariko ntabyemere. Mu masezerano Javier Martinez yagiranye na Rayon Sports, igihe yaba yirukanwe amasezerano ye atarangiye, yahabwa ukwezi kumwe gusa k’umushahara kw’imperekeza.

Javier Martinez Espinoza atandukanye na Rayon Sports amaze kuyitoza imikino 15 ya shampiyona, aho yatsinzemo imikino icyenda, atsindwa imikino ibiri, anganya ine, akaba ayisize ku mwanya wa gatatu n’amanota 31 arushwa na APR FC ya mbere amanota atandatu. Javier Martinez Espinoza asize Rayon sports ku mwanya wa Gatatu n’amanota 31.

Espinoza abaye umutoza wa munani utandukanye n’ikipe ye uyu mwaka nyuma ya Ovambe Olivier wirukanwe na Mukura; Seninga Innocent wasezeye kuri Etincelles FC; Bisengimana Justin wirukanwe na Bugesera FC; Niyongabo Amars wirukanwe na Musanze FC; Nduwantare Jean Marie Vianney wirukanwe na Gicumbi FC ndetse na Stephen Johansson wasezeye kuri Heroes FC na Burucaga watandukanye na Kiyovu Sports.

108 total views, 1 views today

Facebook Comments
Share Button

auto ads

Recommended For You

About the Author: Jean Paul Nsanzabera

Leave a Reply

Your email address will not be published. Required fields are marked *