Umujyi wa Kigali watangiye gusenya inzu z’umuryango wa Milimo zubatse mu gishanga Nyabugogo

Umujyi wa Kigali kuri uyu wa Gatanu tariki 15 Gicurasi 2020, watangije ibikorwa byo gusenya inzu z’umuryango wa Milimo Gaspard, ziherereye i Nyabugogo, mu kurengereza ubuzima bw’abahakoreraga ibikorwa byabo by’ubucuruzi kuko hakunze kwibasirwa n’ibiza biterwa n’imvura.

Umuryango wa Milimo uvuga ko izi nzu ziherereye mu Murenge wa Kimisagara, kuzisenya ari akarengane.

Umugore wa Milimo, Gahongayire Winfried yagize ati “Turimo gukorerwa akarengane no kwica amategeko nkana kuko mu 2005 twagize urubanza ruba itegeko, urukiko ruca urubanza ko inzu zidasenywa, twaregaga Umujyi wa Kigali, bo bavugaga ko ari ukubera igishanga n’umugezi wa Mpazi.”

Yakomeje agira ati “Urukiko rwari rwabategetse ko bagombaga kubakira umugezi wa Mpazi, icyo gihe [umujyi] banawuciye miliyoni 127 z’amafaranga y’u Rwanda n’indishyi za miliyioni 40, ibyo barabyubahirije amafaranga barayatanga ariko dore bongeye kudusenyereza.”

Umujyi wa Kigali usanga ibyakozwe ari ukurokora abaturage

Ubuyobozi bw’Umujyi wa Kigali, uvuga ko inyigo yakozwe aho izi nzu ziherereye, yagaragaje ko kugira ngo iki kibazo gikemuke, ari uko hakwagurwa kubera umugezi wa Mpazi ukunze gusenyera abantu, ibi bikaba byaragombaga gukorwa ari uko inzu ziwegereye zihavanwa.

Umuyobozi ushinzwe ibikorwa remezo by’amazi n’isuku mu Mujyi wa Kigali, Eng. Fidèle Tuyisenge, avuga ko gusenya aha hantu atari ukubarenganya, ahubwo ari ukurengera ubuzima bwa benshi kuko hari n’abamaze kuhatakariza ubuzima.

Yagize ati “Aha hantu hakunda kuba imyuzure ku buryo muri ibi bice byose amazi azamuka akagera mu mavi y’abantu bahari mu gihe cy’imvura, nyuma rero yo kubona ibibazo ko bigenda byiyongera, Umujyi wa Kigali ntabwo wicaye kuko ubuzima bw’abakorera hano bwari mu kaga, nibwo hakozwe inyigo ku bufatanye n’ibindi bigo mu 2015, bigaragazwa ko Mpazi igomba kwagurwa ndetse aho ihurira na Nyabugogo, hagatunganywa neza kugira ngo amazi ajye abasha kugenda.”

Avuga ko inyigo yagaragaje ibyakorwa ko harimo kwagurwa no kuyobora neza umugezi wa Mpazi werekeza kuri Nyabugogo, ubu bakaba ari byo barimo gukora.

Ati “Ntabwo ari akarengane kuko iyo uganiriye n’abantu baha bakubwira ko hamaze kwangirikira ibintu byinshi ndetse n’abantu bahapfiriye, abacuruzi bagira ibihombo hari hasigaye ko abakoreramo nabo bapfa, ntabwo leta yakomeza kurebera, icyakozwe ni ukurengera ubuzima aho kureba inyungu z’umuntu umwe.”

Avuga ko aho izi nyubako ziri ari mu gishanga ugendeye ku gishushanyo mbonera cy’Umujyi wa Kigali, kandi nta muntu wemerewe gukorera ubucuruzi mu gishanga.

Agaragaza ko kubaka aha hantu bizarangira mu kwezi kwa Kane umwaka utaha.

Mu 2016 nibwo umunyememari Milimo Gaspard wari usanzwe akora ubucuruzi mu Mujyi wa Kigali yapfuye azize uburwayi agwa muri Kenya.

Yaramenyekanye cyane kubera ikibazo yagiranye n’Umujyi wa Kigali mu 2004 ubwo iyi inzu ye y’ubucuruzi iherereye Nyabugogo hafi y’Ikiraro gitandukanya Umurenge wa Kimisagara n’uwa Gatsata yari igiye gusenywa kuko yubatse mu gishanga.

Iki kibazo cyageze no kuri Perezida Kagame, hafatwa umwanzuro ko iyo nzu idasenywa kuko yari yarubatswe ubuyobozi burebera ikagera aho yuzura ntawe umuhagaritse.

Mu 2015, indi nzu ya Milimo yari iherereye mu Murenge wa Kimisagara yasenywe n’Umujyi wa Kigali, kubera ko yari yubatswe mu gishanga nta n’ibyangombwa.

Iyo nzu yasenywe yari igizwe n’inyubako ebyiri zakorerwagamo ubucuruzi mu gishanga cy’umugezi wa Nyabugogo, ikaba yari irimo n’igaraje.

Imvura imaze iminsi igwa mu hirya no hino mu gihugu imaze guhitana abantu barenga 72, yangiza n’ibindi bikorwa remezo.

Guverinoma ikomeje gusaba buri wese utuye ahashobora gushyira ubuzima bwe mu kaga n’abandi ko yahava, kuko ubuzima ari bwo buza imbere ya byose.

Ubuyobozi buvuga ko izi nzu ziri mu gishanga bityo kuzisenya ari ukurokora ubuzima bw’abahakorera

976 total views, 3 views today

Facebook Comments
Share Button

auto ads

Recommended For You

About the Author: mc dammy emmanuel

Leave a Reply

Your email address will not be published. Required fields are marked *