Liverpool ikomeje gushaka igikombe cya shampiyona iheruka mu 1990, aho yabishimangiye itsinda Chelsea ibitego 2-0 mu mukino w’umunsi wa 34 wa Premier League, ikomeza gusiganwa na Manchester City yo yatsinze Crystal Palace ibitego 3-1 kuri iki Cyumweru.
Mbere y’uyu mukino, hari hategerejwe kurebwa niba Chelsea ishobora kongera kubuza Liverpool gutwara shampiyona nk’uko byagenze mu 2014. Kuri iki Cyumweru, Liverpool yihariye umukino kuva utangiye kugeza urangiye.
Nyuma y’uburyo bwabonetse ku ruhande rwa Liverpool, ku mupira watewe na Naby Keita ukajya mu biganza by’umunyezamu Kepa Arrizabalaga, Eden Hazard ntiyabashije kubyaza umusaruro amahirwe Chelsea yabonye ku munota wa 20 mu gihe na mugenzi we Willian yateye ishoti rikomeye nyuma y’iminota 10, umupira ujya hanze.
Liverpool yabonye uburyo bwinshi butandukanye, burimo umupira wakozweho na Mohamed Salah, ukagarukira Jordan Henderson wateye ishoti rikomeye, umupira ugonga David Luiz ujya muri koruneri. Sadio Mané nawe yateye ishoti ryaciye ku ruhande rw’izamu nyuma yo guherezwa umupira mwiza na Salah.
Byasabye iyi kipe yari mu rugo, gutegereza umunota wa 51, ifungura amazamu ku gitego cyatsinzwe na Sadio Mané n’umutwe, ku mupira wari uhinduwe na Jordan Henderson, usanga uyu munya-Sénégal hafi y’izamu, arasimbuka maze yohereza umupira mu rushundura akoresheje umutwe.
Liverpool yakomeje kotsa igitutu ikipe ya Chelsea, iza kubona igitego cya kabiri gishimangira intsinzi nyuma y’iminota ibiri gusa, ku ishoti Mohamed Salah yatereye muri metero nka 25, umunyezamu Kepa ntiyabasha kugera ku mupira. Uyu munya-Misiri ntabwo yishimiye iki gitego kuko yakiniye Chelsea mbere yo kugurishwa mu Butaliyani.
Gutsinda uyu mukino, byatumye Liverpool igira amanota 85 ku mwanya wa mbere muri Premier League, aho imaze gukina imikino 34. Manchester City yatsinze Crystal Palace ibitego 3-1, yo ifite amanota 83 mu mikino 33.
Ni nde uzegukana Premier League uyu mwaka?
Biragoye guhita wemeza ko ikipe runaka, hagati ya Liverpool na Manchester City, yakwegukana igikombe cy’uyu mwaka, ariko abenshi baha amahirwe Liverpool nk’ikipe kugeza ubu iri imbere ndetse isigaje imikino y’amakipe adakomeye cyane.
Imikino Liverpool isigaje: Cardiff City (hanze), Huddersfield (mu rugo), Newcastle United (hanze) na Wolves (mu rugo).
Imikino Manchester City isigaje: Tottenham (mu rugo), Manchester United (hanze), Burnley (hanze), Leicester City (mu rugo) na Brighton (hanze).
Urugamba rwo kuza mu makipe ane ya mbere na rwo rurakomeje
Gutsindwa kwa Chelsea, na yo byayishyize mu kaga ko gukomeza gukubana n’andi makipe bahatanira hamwe kuza mu makipe ane ya mbere azakina UEFA Champions League mu mwaka utaha.
Tottenham ni iya gatatu n’amanota 67 mu mikino 33, Chelsea ifite amanota 66 mu mikino 34, Manchester United ifite amanota 64 mu mikino 33 mu gihe Arsenal ifite amanota 63 mu mikno 32.
Imikino Tottenham Hotspur isigaje: Manchester City (hanze), West Ham (mu rugo), Bournemouth (hanze), Everton (mu rugo) na Crystal Palace (mu rugo).
Imikino Chelsea isigaje: Burnley (mu rugo), Manchester United (hanze), Watford (mu rugo), Leicester City (hanze) na Brighton (mu rugo).
Imikino Manchester United isigaje: Everton (hanze), Manchester City (mu rugo), Chelsea (mu rugo), Huddersfield (hanze), na Cardiff City (mu rugo).
Imikino Arsenal isigaje: Watford (hanze), Crystal Palace (mu rugo), Leicester City (hanze), Brighton (mu rugo), Burnley (hanze) na Wolves (hanze).
