ibitaramo bya Rwandan Music First bigiye gutangira muri uku kwezi kwa 8

Abahanzi bagera kuri 35 basanzwe bazwi mu Rwanda bagiye guhurira mu bitaramo bizazenguruka tumwe mu turere tw’igihugu bamenyekanisha umuziki bakora nk’uburyo bwo kuwushyira ku isonga mu wumvwa n’abaturage cyane.

Ibi bitaramo byiswe “Rwandan Music First” byateguwe na bamwe mu basanzwe bagirana isano n’umuziki nyarwanda barimo abahanzi ubwabo, abanyamakuru n’abandi batandukanye.

Ni igitekerezo bavuga ko cyashibutse mu ‘rugendoshuri’ bagiriye muri Uganda ubwo bamwe muri bo baherekezaga The Ben yagiye gutaramirayo bagasanga muri icyo gihugu nta muziki nyarwanda ucurangwayo. Bahise bategura ibi bitaramo bifasha abahanzi bo mu Rwanda kumenyekanisha ibyo bakora ariko ngo “ijya kurisha ihera ku rugo.”

Umunyamakuru wa City Radio, Joel Rutaganda, uhagarariye iki gikorwa avuga ko ibi byageragejwe kenshi ariko ubu ari wo mwanya wa buri munyarwanda wese guha agaciro umuhanzi n’ibihangano bye bityo n’u Rwanda rukagira abahanzi bashobora gutumirwa mu bitaramo bikomeye bibera hanze kubera ko Abanyarwanda ubwabo bashyigikiranye.

Ati “Si ubwa mbere twagerageje kuba twakwishyira hamwe, yaba abanyamakuru n’abahanzi ngo twige ku ngamba zatuma umuziki wacu urenga imbibi ariko bikatunanira. Ahubwo ugasanga turacunganwa no kumenya umuhanzi wiganye (gushishura) indiririmbo z’ahandi. Niyo mpamvu twishyize hamwe na bo ngo tugerageze gushishikariza Abanyarwanda bo mu turere dutandukanye ibi bitaramo bizageramo gukunda iby’iwabo cyane kuruta kuba yashyigikira kanaka udafite icyo yinjiriza igihugu.”

Rutaganda yavuze ko ibi bitaramo bateguye bizaba birimo abahanzi basanzwe bazwi mu Rwanda bagera kuri 35, biteganyijwe ko bizahera mu Karere ka Rusizi mu Ntara y’Uburengerazuba ku itariki ya 11 Kanama 2018 mu rwego rwo kugira ngo n’abatuye muri ako karere bumva andi maradiyo yo mu bihugu byegereye u Rwanda bamenye ko mu Rwanda hari umuziki kandi ushobora guteza imbere umuhanzi n’igihugu muri rusange.

Mu kiganiro n’Umuyobozi w’Ihuriro ry’Abahanzi Nyarwanda, Tuyisenge Intore yavuze ko ihuriro ahagarariye rishyigikiye cyane icyo gitekerezo ko imbaraga nizihuzwa hagati y’abahanzi, abanyamakuru n’abanyarwanda muri rusange umuziki uzagira indi sura.

Yavuze ko nk’urugaga rwa muzika nyarwanda bashyigikiye iki gikorwa kuko ahanini wasangaga abantu ahacurangirwa umuziki bibanda ku waturutse mu mahanga, nyamara abo hanze mu bihugu byabo bo badaha uwo mu Rwanda ako gaciro.

Ati “Igitekerezo bagize kijyanye na gahunda yo guteza imbere ibikorerwa iwacu, twashimye cyane rero kuba baragize igitekerezo cyo guteza imbere muzika nyarwanda by’umwihariko aho ibihangano by’abanyarwanda ari byo bigomba gucurangwa cyane kandi bigacurangwa ku bwinshi hano muri iki gihugu.”

Yongeyeho ati “Bikwiriye kuba umuco w’abantu bose kumva ko niba mu bice byiciro hari gutezwa imbere ibikorerwa iwacu n’ibihangano by’abanyarwanda bikwiriye gutezwa imbere, ababicuruza, ababikoresha bakumva ko n’umuhanzi w’umunyarwanda bikwiriye kumutunga, impano y’abahanzi ikaba n’ubukungu bwabo.”

Nyuma y’igitaramo cya mbere kizabera i Rusizi hazakurikiraho utundi turere bahereye kuri Nyagatare, Rwamagana, Rubavu, Musanze, Huye na Muhanga. Muri ibyo bitaramo hakazajya hajya abahanzi batanu bitewe n’uko bakunzwe muri buri ntara n’abo bazajya basangayo bahakorera bazwi n’abaturage.

Iki gikorwa cy’ubukangurambaga bavuga ko kinareba cyane abategura ibitaramo bitandukanye bibera mu Rwanda bahereza intica ntikize umuhanzi w’umunyarwanda byagera ku banyamahanga bakabahemba amafaranga y’umurengera nubwo hari igihe birangira baririmbye no mu buryo butari umwimerere.

433 total views, 1 views today

Facebook Comments
Share Button

Subscribe now

k

auto ads

Recommended For You

About the Author: Jean Paul Nsanzabera

Leave a Reply

Your email address will not be published.