Miss Akiwacu Colombe yahawe impamyabumenyi ya kaminuza mu Bufaransa

Nyampinga w’u Rwanda 2014, Akiwacu Colombe, yahawe impamyabumenyi y’icyiciro cya kabiri cya Kaminuza mu masomo yerekeye ubucuruzi aho yigaga mu Bufaransa.

Yari amaze imyaka itatu yiga i Paris mu Bufaransa aho yerekeje muri Nzeri 2015 ubwo yavaga mu Rwanda. Yavuze ko yasoje amasomo ye muri INSEEC Bachelor.

Nyampinga Akiwacu mu butumwa bwe kuri Facebook yashimiye abantu batandukanye bamufashije kugera kuri ibi barimo na Se umubyara n’abavandimwe be avuga ko nubwo atabona icyo abituye ariko azirikana uko bamufasha mu buzima bwa buri munsi.

Yagize ati “Intsinzi yose ni umusaruro wo gukora cyane ariko na none ni itangiriro ry’urugendo rushya! Ndashimira buri muntu wamfashije kurenga intambamyi zose mu gukora kwanjye, ndashimira umuryango wanjye ku bw’ubufasha bugikomeje mumpa mu buri mwanzuro w’ubuzima bwanjye. Ntabwo nabona icyo mbituye ku bw’ibyo munkorera ariko nizeye kubatera ishema no gutuma mwishima.”

Nyampinga Akiwacu yagiye mu Bufaransa afite umushinga wo kubakira inshike za Jenoside yakorewe Abatutsi inzu ebyiri yatangije mu mpera za 2014, akomerezayo ubukangurambaga bwawo.

Uyu mwari umaze imyaka itatu aba i Paris mu bikorwa by’amarushanwa y’ubwiza yaherukaga guhagararira u Rwanda muri Miss Supranational mu 2016. Yanagaragaye mu bikorwa bitandukanye byo kumurika imideli aho yakunze gukorana n’inzu yitwa Gwanni.

Akiwacu Colombe ni mwene Gatali Vital na Mukankusi Immaculée. Yavutse taliki ya 31 Ukwakira 1994. Ni umwana wa kane mu bana batanu bavukana.

Amashuri abanza yayize mu ishuri rya St Joseph ku Kicukiro aza kuyasoreza mu kigo cya APAPER na ryo riherereye mu karere ka Kicukiro, na ho amashuri yisumbuye icyiciro rusange yize mu Byimana, icyiciro cya kabiri cy’ayisumbuye yakize muri Stella Matutina riri i Shyorongi mu Karere ka Rulindo mu ntara y’Amajyaruguru.

 

428 total views, 1 views today

Facebook Comments
Share Button

Subscribe now

k

auto ads

Recommended For You

About the Author: Jean Paul Nsanzabera

Leave a Reply

Your email address will not be published.