Muri ibi bihe bitoroshye Abahanzi bafite ubushobozi nabo bakwiye kwigira bagafasha bagenzi babo

Covid-19 yatangiriye mu Bushinwa ubu yamaze kongera gukaza umurego ku buryo Leta yabujije abaturage gukora ingendo zitateganyijwe. Mu Rwanda abantu iri kwica bariyongera aho kugabanuka. Urwego rw’ubuhanzi rubaho rugatanga umusaruro iyo hariho ibikorwa b’imyidagaduro.

Mu 2020 hari bamwe mu bahanzi twabuze mu ruhando rwa muzika ariko ntiberure ngo bavuke ko biterwa n’ikibazo cy’ubushobozi nyamara ugasanga itangazamakuru rirabahoza ku nkeke ribabaza ibikorwa. Niba igitaramo cya nyuma cyarafunzwe ku ya 8 Werurwe mu 2020 hari umuntu umwe wanduye, ubu abanyarwanda bari guhitanwa na Covid-19 bakaba bari kwiyongera buri joro, birakwereka ko gufungura ibitaramo atari ibintu biri hafi aha.

Ahandi nko muri Zimbabwe basubijeho Guma mu rugo, mu Bushinwa aho iyi ndwara yatangiriye bamaze gufata ingamba zikarishye zo kurwanya coronavirus nyamara bari biraye bazi ko bayihashyije. Ni byo urukingo rwamaze kuboneka ndetse mu barutewe harimo n’umunyarwandakazi ukorera umwuga w’ubuganga muri Canada wamaze guterwa urwo rukingo, gusa rurahenze ku buryo buri wese urukaneye hatabayeho inkunga ya za Leta ntabwo rwapfa kukugeraho kandi ukennye.

Hari abahanzi babuze burundu mu 2020 bashobora kuzimira bagasezera umuziki mu 2021.

Ni kenshi hakozwe inkuru zigaruka ku bahanzi batakoze cyane umwaka ushize ndetse inyinshi zakuruye impaka ku mbuga nkoranyambaga n’ubwo ukuri kuryana ariko icyo wamenya n’uko abantu benshi batamenyereye ibintu bibavugwaho bitagenda ahubwo amatwi ya benshi aba ashaka guhora yumva akanasoma inkuru zigenda umujyo umwe zishima kabone n’ubwo nta cyo gushima cyaba gihari.

Muribuka ko hari abahanzi mukunda mwabuze neza umwaka wose ukarangira rimwe na rimwe mukajya mubaza amakuru yabo ntimuyabone kuko nta bikorwa bya muzika bagaragayemo mu 2020 bitewe na Covid-19 yashyize ibintu i rudubi. Biratangaje kuba umuhanzi yaba yarageze ku rwego rwo kuba buri cyumweru indirimbo 10 zikunzwe mu gihugu hose aba arimo ariko umwaka wose ugashira nta gihangano, aba ari kugenda asezera umuziki gahoro gahoro.

Mu Rwanda abahanzi batabarizwa mu nzu zimenyerewe nka Labels bashobora kuzasezera umuziki mu gihe hatabaho kubatabariza

Ubusanzwe umuhanzi nyarwanda yinjiriza mu bitaramo, inama, ubukwe n’iminsi mikuru aba yatumiwemo. Abafite amazina baba bafite amasosiyete bakorana nayo mu kwamamaza ariko nayo bakorana bitewe n’ibikorwa baba bamaze kugeraho birimo amazina ahambaye akenshi bakururirwa n’indirimbo baba bakoze zigakundwa.

Rero mu gihe hatabaho ko itangazamakuru rikora imyidagaduro ritabariza abahanzi hari amazina ya bamwe twakunze mbere ya 2020 tutazongera kumva nyuma ya 2021 iki cyorezo kibaye kigikomeje bitewe n’uko abahanzi bazaba baragerageje gukora bazibagiza abanyarwanda bamwe bari basanzwe bazi.

Urugero hari abahanzi umwaka wa 2020 washize bakoze indirimbo imwe ndetse hari n’abatinye kwinjira mu nzu zitunganya imiziki kuko babonaga ntaho bakungukira none umwaka wose ugashira batongeye kumvikana mu matwi y’abakunzi babo.

Leta ifite umukoro

Leta y’u Rwanda ni umubyeyi. Ibi nta we ubishidikanyaho kandi igenda igoboka buri wese uba ari mu kaga agafashwa kukikuramo. Igikenewe ni ukureba amafaranga yatanzwe na Art Rwanda Ubuhanzi ku bufatanye na Imbuto Foundation niba koko azakoreshwa ibyo abayegukanye bijeje abanyarwanda ko bagiye kubikora. Twabibutsa ko imishinga yahize iyindi, iramutse ishyizwe mu bikorwa neza, yagoboka cyane igisata cy’imyidagaduro.

Ni kenshi hagiye habaho imishinga ya baringa igahabwa amafaranga nyamara bikarangira ariwe ntagire icyo amarira abagakwiriye kuyungukiramo. Minisiteri y’Urubyiruko n’Umuco, Inteko Nyarwanda y’Ururimi n’Umuco na Imbuto Foundation babinyujije muri ArtRwanda-Ubuhanzi batangije ikigega cya Miliyoni 300 Frw cyo kugoboka abahanzi bagizweho ingaruka na Covid-19.

Ni ikigega “Cultural Creative Industry (CCI) Recovery Plan” kigamije kuzahura ‘Inganda Ndangamuco’, ibigo n’abahanzi bagizweho ingaruka zikomeye muri ibi bihe bigoye bya Covid-19. Kikaba cyaratangiranye akayabo ka miliyoni 300 z’amafaranga y’u Rwanda. Abafite imishinga yahize iyindi bamaze gupfumbatishwa sheki ya miliyoni 10 kuri buri mushinga.

Izi miliyoni ku bantu bari basanzwe babona amafaranga avuye mu bitaramo n’ahandi hafitanye isano n’umuziki, hari icyo yakora. Icyakora ku rundi ruhande niba twarabonye abahanzi batwara miliyoni 25 begukanye PGGSS nyuma y’imyaka mike bakaba batabasha gukora indirimbo muri studio ntibitangaje kuba miliyoni 10 zaribwa ntizitange umusaruro. Leta ikwiriye kugenzura bihagije ikoreshwa ry’ayo mafaranga yahawe abatsindiye izo miliyoni 10.

Nk’uko ari ikigega cyatangijwe hakwiriye kubaho icyiciro cya kabiri cyo kugoboka abahanzi bari basanzwe bafite amazina ariko ubushobozi bukaba bwarashize. Urugero hari abahanzi bafatanyije na Nyakubahwa Perezida Kagame Paul ubwo yiyamamazaga mu 2017 ndetse akanabizeza kuzabashyigikira. Bamwe mu bo twabonye bifotozanya ubu ntibohorowe na busa ndetse hari n’abadafite icyizere cyo kuzongera gusubira muri studio kubera ko nta mikoro bafite.

Abo bahanzi bakwiriye gutekerezwaho bagafashwa mu buryo bwo kubagarura mu ruhando rwa muzika kuko impano barazifite ariko nta bushobozi. Minisiteri ifite abahanzi mu nshingano ikwiriye gukomanga ahantu hose hashoboka igashakira abahanzi nyarwanda inkunga kuko hari igihe coronavirus yazarangira ikajyana na bamwe mu bahanzi bafashije igihugu mu iteramere kimaze kugeraho aho amazina yabo dushobora kuzayibagirwa bitewe n’uko babuze ubushobozi bagahagarika burundu umuziki.

Leta ifatanyije n’urugaga rw’abahanzi ikwiriye guhugura abahanzi uburyo bwo gukoresha ikoranabuhanga ririmo imbuga nkoranyambaga noneho bakaba babyaza umusaruro YouTube n’izindi mbuga zikoreshwa mu kugurisha ibihangano. Abahanzi nabo bakwiriye kwiga isomo ryo kwizigamira no gutekereza gushora mu zindi bizinesi zishobora kubagoboka mu gihe ibihe byakomeza kuba bibi.

Uruganda rwa muziki mu gihe rwakomeza gusubira inyuma abahanzi bafite amazina n’impano bakagenda bazimira hari igihe hazabaho kwicuza ko nta cyakozwe mu kubarengera nyamara biracyashoboka. Abahanzi bafite ubushobozi bakwiriye gufasha barumuna babo bakabazamura nk’uko Bruce Melodie (Igitangaza), Dj Pius (1K Entertainment) n’abandi barimo abanyamakuru nka M.Irene bari kugenda bazamura abahanzi bafite impano.

Abahanga bakomeje kugaragagaza ko coronavirus abantu bakwiriye kwiga kubana nayo. Za Leta ziri gukora ibishoboka byose ngo inkingo ziboneke. Icyakora nta gisubizo kirambye gihari mu kuzahura uruganda rw’imyidagaduro mu gihe hari amazina dukomeje kuburira irengero kandi barafashije sosiyete kwiyubaka.

Umuhanzi nyarwanda kugira ngo abamukunda bahore bamwumva akenera gukora indirimbo nziza kandi akayigeza ku banyarwanda. Biragoye mu gihe asabwa amafaranga kandi ntaho azayagaruriza ari cyo kiri gutuma hari abo tutabona tukaba twabarenganya ngo ntibakora nyamara ubuzima bwabo butorohewe.

Mu kiganiro ya InyaRwanda.com mu gihe gishize, Hon. Edouard Bamporiki Umunyamabanga wa Leta muri Minisiteri y’Urubyiruko n’Umuco, yavuze ko ubuhanzi ari segiteri itarigeze yubakwa, anatanga inama. Ati: “Ikigaragara ni uko, umuntu atiriwe ajya mu bintu byinshi, ibintu by’Ubuhanzi ni segiteri itarigeze yubakwa yaba urwego rwa Leta cyangwa na ba nyirayo kuko iyo urwego rwiyubatse mu bihe bikomeye ruritunga. Urwego iyo rufite imbaraga mu bihe by’amajye rwibeshaho.”

Minisitiri Bamporiki yakomeje avuga ko ikinini kirimo ari amasomo abahanzi bagomba kwigiraho yo kuzigama no kubaka inzego z’ubuhanzi nka za Federasiyo zabo na ‘Art Council’ kuko iyo biba bityo izi nzego zari kubatunga bitagoranye. 

Gusa yavuze ko hatabaho guhangayika kuko ntawuzi niba bizamara igihe kinini ariko binabaye yavuze ko habaho gufasha abahanzi bitiriwe bitangazwa mu binyamakuru kuko ngo “ukemura ingorane atari ngombwa ko hazamo kubyamamaza”.Ugendeye kuri ibi yatangaje, mu bigaragara ni uko Leta izirikana abahanzi nk’uko twanabikomojeho hejuru ko Leta ari umubyeyi. Iyi nkuru ishingiye ku bitekerezo by’umunyamakuru.

Abahanzi bafite ubushobozi nabo bakwiye kwigira bagafasha bagenzi babo

src:inyarwanda

640 total views, 1 views today

Facebook Comments
Share Button

Subscribe now

k

auto ads

Recommended For You

About the Author: kalisa john

Leave a Reply

Your email address will not be published.