Nyanza: Umuturage ashinja abanyerondo kumukubita fer à béton akavunika akaguru

Umuturage wo mu Murenge wa Mukingo mu Karere ka Nyanza, ashinja abanyerondo kumuhohotera aho bamukubise inkoni y’icyuma ya “fer à béton” ahinduka intere, yajijijwe ko yatashye iwe amasaha ya Gera mu Rugo yarenze igihe kugera mu rugo byari saa moya (19h00).

Sekimonyo Christophe ni umugabo ufite umugore n’abana batanu, ubu arwariye mu Bitaro bikuru bya Nyanza.

Atuye mu Mudugudu wa Cyahafi, Akagali ka Gatagara mu Murenge wa Mukingo mu Karere ka Nyanza, ashinja abanyerondo kumukubita “fer à béton” ku kaguru agahinduka intere.

Uburwayi avuga ko amaranye amezi atatu avuga ko yabutewe n’uko ubwo yari atashye yahuye n’abanyerondo bamukubita icyuma cya fer à béton ku kaguru arakomereka ndetse akaguru karavunika.

Ati “Navuye mu kazi mpura n’abanyerondo bansaba guhagarara bankubita fer à béton kuko ngo natinze gutaha.”

Sekimonyo akomeza avuga ko imibereho ye itamworoheye, agasaba guhabwa ubutabera. Ikibazo ke avuga ko cyageze ku Munyamabanga Nshingwabikorwa w’Akagali ka Gatagara atuyemo ahishira abamukomerekeje.

Ati “Gitifu w’Akagali yashyigikiye abantu bampemukiye bamarana ibyumweru bibiri bakorana ku irondo kandi azi ko nakomerekejwe.”

Uyu mugabo ngo imibereho ntimworoheye mu gihe ari we wakoreraga urugo rwe riurimo abana 5

Umunyamabanga Nshingwabikorwa w’Akagali ka Gatagara, Edison Dushimimana yavuze ko ibyo umuturage avuga ko bitandukanye n’ibyo abanyerondo bavuga.

Abanyerondo bavuga ko uriya muturage yakomerekejwe n’abo bariho basangira mu kabari (Abanyerondo babwiye Gitifu ko Sekimonyo yari mu kabari), ko atari bo bamukubise.

Nk’ubuyobozi icyo bihutiye gukora ngo ni ukubwira umuturage akajya kuregera Urwego rw’Ubugenzacyaha (RIB), ati “Ubu ikibazo kiri mu nkiko.”

Edison Dushimimana abajijwe ibyo guhishira abanyerondo yagize ati “Hafashwe abantu bane (4) baranafungwa, kandi kugira ngo bafatwe twabahaga inyandiko ibatumiza (convocation) kandi nitwe zanyuragaho tukazibaha tukanabategeka kujya kwitaba ngo basobanure uko byagenze, niba avuga ko nabahisharaga ntabwo ari ukuri.”

Umuyobozi w’Akarere ka Nyanza, Ntazinda Erasme avuga ko ikibazo cy’uriya muturage bakimenye kandi ubutabera buri gukora akazi kabwo.

Ati “Nibyo uwo muturage yahohotewe n’abari bakoze irondo kandi abo bantu barafashwe dosiye iri mu butabera dutegereze tuzamenye icyo buzayigenera.”

Abanyerondo Sekimonyo ashinja kumukomeretsa ni bane, abaturanyi ba Sekimonyo na we ubwe bahamya ko ubu barekuwe n’inkiko bari hanze bidegembya.

Ntazinda Erasme uyobora Akarere ka Nyanza avuga ko ikibazo cyageze mu nzego z’ubutabera

Src:Umuseke.rw

907 total views, 1 views today

Facebook Comments
Share Button

Subscribe now

k

auto ads

Recommended For You

About the Author: Blackcat Thierry

Leave a Reply

Your email address will not be published.