Abazitabira ibirori byo gusoza Iserukiramuco rya ‘Giants of Africa’ bahawe amahirwe yo kuzatsindira itike yo gusabana n’abahanzi bazatarama muri ibi birori biteganyijwe kubera muri BK Arena ku wa 19 Kanama 2023.
Nkuko byatangajwe n’ubuyobozi bwa BK Arena, abazaba bageze muri iyi nyubako izakira igitaramo mbere ya saa saba bazahatanira amatike azatuma babasha gusabana n’abahanzi bazaririmba.
Abanyamahirwe bazaba batsindiye gusabana n’aba bahanzi, bazagira amahirwe yo guhura nabo baganire ndetse babe banafatana amafoto y’urwibutso.
Iki gitaramo giteganyijwe gutangira saa Munani n’igice z’amanywa zo ku wa Gatandatu tariki 19 Kanama 2023.
Ni igitaramo giteganyijwe kuririmbamo abahanzi nka Davido wanamaze kugera i Kigali, Tiwa Savage, Tayla na Bruce Melodie, hasozwa Iserukiramuco rya ‘Giants of Africa’.
Iki gitaramo gikurikira icyabaye ku wa 13 Kanama 2023 cyo gufungura iri serukiramuco, cyararirimbyemo Diamond, Intore Massamba n’umubyinnyi Sherri Silver.
Igitaramo cyo gufungura iri serukiramuco cyasigiye ibyishimo ibihumbi by’abacyitabiriye bari banarimo Perezida Paul Kagame.
About Author
